Göygöl rayonunda leysan yağışların törətdiyi fəsadlar aradan qaldırılır
Göygöl, 17 iyul (AZƏRTAC). Bir neçə gün əvvəl yağan leysan yağışların Göygöl rayonunda törətdiyi fəsadların aradan qaldırılması üçün təcili tədbirlər görülür.
Artıq sel sularının ən çox ziyan vurduğu Sabir, Nərimanov, Nizami, Dadaş Bünyadzadə və digər kəndlərdə yaranmış gərginlik aradan qaldırılmışdır. Küçələrdə suötürücü borular təmizlənmiş, bəzi küçələrdə isə kiçik borular iri diametrli borularla əvəz edilmişdir.
Hazırda vətəndaşlara məxsus evlərin uçmuş hasarları yenidən tikilir, dağılmış səkilər bərpa edilir. Köşkü kəndi ərazisində dağlardan rayon mərkəzinə gələn sel sularının istiqamətinin dəyişdirilməsi üçün 3 kilometr uzunluğunda yeni kanal qazılır. Topalhəsənli, Şəhriyar, Zurnabad, Kərəmli kəndlərini birləşdirən avtomobil yolunda isə sel sularının yaratdığı fəsadlar tamamilə aradan qaldırılmışdır.
Rayon fövqəladə hallar komissiyasının sədri Turani Əliyev AZƏRTAC-a demişdir ki, təbii fəlakət nəticəsində şəhərin 5 küçəsində 70-dən çox ailəyə ziyan dəymişdir. Rayon rəhbərliyi bütün qüvvələri səfərbərliyə alaraq bu ziyanın tezliklə aradan qaldırılması üçün tədbirlər görür. Təbii fəlakətin baş verdiyi ərazilərə çoxlu sayda texnika və canlı qüvvə cəlb edilmişdir.
Bölmənin digər xəbərləri
