İQTİSADİYYAT
GTZ CƏNUB BÖLGƏSİNDƏ İŞ ADAMLARINA KÖMƏK GÖSTƏRƏCƏKDİR
1996-cı ildən Azərbaycanda fəaliyyət göstərən Almaniya Texniki Əməkdaşlıq Cəmiyyəti (GTZ) ölkəmizin siyasi, iqtisadi və sosial inkişafını dəstəkləmək məqsədi ilə müxtəlif layihələr həyata keçirir. GTZ İqtisadi İnkişaf Nazirliyi ilə birlikdə kiçik və orta müəssisələrə həmin layihələrdən biri – “Özəl sektorun inkişafı” layihəsi üzrə kreditlərin alınmasına kömək edir.
GTZ-nin “Özəl sektorun inkişafı” layihəsinin əməkdaşları Sahibkarlığa Kömək Milli Fondundan kreditlərin alınması üçün biznes planlarının hazırlanmasında müəssisələrə kömək göstərmək və digər kredit təşkilatları ilə əlaqə yaratmaq məqsədi ilə respublikamızın cənub bölgəsində özəl müəssisələrin fəaliyyəti ilə yaxından tanış olmuşlar.
Cəmiyyətin əməkdaşı İlqar Ümidov AZƏRTAC-ın müxbirinə demişdir ki, kreditlər alınması üçün biznes planları tərtib edilərək müvəkkil banklara təqdim olunacaqdır.