İDMAN
GÜC STRUKTURLARI KOMANDALARI ARASINDA ATICILIQ ÜZRƏ BİRİNCİLİK BAŞLAMIŞDIR
Avqustun 20-də Azərbaycan Respublikası Xüsusi Dövlət Mühafizə Xidmətinin idman kompleksində güc strukturlarının atıcılıq üzrə ikinci şəxsi və komanda birinciliyi yarışlarının açılış mərasimi olmuşdur.
Atıcılıq Federasiyasının prezidenti, Xüsusi Dövlət Mühafizə Xidməti rəisi general-leytenant Vaqif Axundov birinciliyi açıq elan etdi. Ölkəmizin himni səsləndi, dövlət bayrağı qaldırıldı.
Vaqif Axundov mərasim iştirakçılarını salamlayaraq bildirdi ki, atıcılıq idmanı gənclər arasında xüsusilə geniş yayılmış və güc strukturları əməkdaşlarının fiziki və döyüş hazırlığının bir hissəsidir. Olimpiya növü olan bu idman Azərbaycanda uğurla inkişaf edir. Ötən il idmançılarımız beynəlxalq yarışlarda yaxşı nəticələr əldə etmişlər. Belə ki, Zemfira Meftahəddinova 2001-ci ildə stend atıcılığı üzrə dünya çempionu olmuş, İradə Haşımova Finlandiyada keçirilmiş dünya çempionatında kiçikçaplı tapancadan 25 metr məsafəyə atəş açmaqda gümüş medala layiq görülmüşdür. Hər iki idmançı bu nəticələrlə yığma komandamız üçün 2004-cü ildə keçiriləcək Olimpiya oyunlarına ilk lisenziyaları qazanmışlar. Yelena Taranova da uğurla yarışıb ölkəmizi Paralimpiya oyunlarında təmsil edəcəkdir.
Lakin atıcılıq Azərbaycanda getdikcə geniş yayılsa da, idman meydançaları hələlik bu növlə məşğul olmaq istəyənlərin hamısını qəbul edə bilmir. Milli Olimpiya Komitəsinin Prezidenti İlham Əliyevin təşəbbüsü ilə tikilən stend atıcılığı kompleksi yaxın vaxtlarda istifadəyə veriləcəkdir. Federasiyanın Prezidenti dedi ki, idmanın bu növü xüsusi əhəmiyyətə malikdir. Çünki o, həm də gənclərin hərbi vətənpərvərlik tərbiyəsinin bir hissəsidir.
Dörd gün davam edəcək birincilikdə Daxili İşlər Nazirliyi və Xüsusi Dövlət Mühafizə Xidməti hər biri iki komanda, müdafiə, milli təhlükəsizlik və ədliyyə nazirlikləri isə hərəsi bir komanda ilə təmsil olunurlar.
Birinci gün qadınlar 9 millimetrlik döyüş tapançasından 25 metr məsafəyə atəş açmaqda yarışmışlar. Komanda yarışlarında DİN-nin birinci komandası qalib gəlmiş, Mühafizə Xidmətinin birinci komandası ikinci, DİN-in ikinci komandası isə üçüncü yeri tutmuşdur. Şəxsi yarışlarda DİN-in birinci komandasının üzvü Natalya Əsgərova qalib gəlmişdir.
Foto İlqar Cəfərovundur