Bakı, 16 fevral, AZƏRTAC

Fevralın 14-də İlham Əliyevin Azərbaycan Respublikasının Prezidenti kimi andiçmə mərasimi təkcə ölkə üçün deyil, bütün region üçün əlamətdar hadisədir. Bu, sadəcə bir mərasim deyil, davamlılıq və inkişafın simvolu, Azərbaycan xalqının və bütövlükdə dövlətin gələcək firavanlığı üçün son dərəcə vacib olan, Azərbaycan xalqının birlik və həmrəyliyinin bariz sübutudur.

Yenidən bu yüksək vəzifəyə uğurla seçilən İlham Əliyev ölkədə sabitliyin, iqtisadi yüksəlişin və inkişafın təşviqi üçün öz fədakarlığını və səylərini davam etdirmək əzmini nümayiş etdirdi. Onun statusu Azərbaycan xalqının böyük dəstəyinin və rəhbərliyinə etimadın təsdiqidir. Bu, ölkənin son iki onillikdə İlham Əliyevin rəhbərliyi ilə keçdiyi tarix uğurlu inkişafın parlaq nümunəsidir və Azərbaycan xalqının tərəqqi arzusunu nümayiş etdirir.

Bu fikirləri AZƏRTAC-a açıqlamasında beynəlxalq əlaqələr üzrə ekspert Masil Dəmirov söyləyib.

O qeyd edib ki, andiçmə prosesi ölkənin konstitusiya normalarına və qanunlarına ciddi riayət olunmaqla həyata keçirilib. Prezidentin Konstitusiya Məhkəməsinin hakimləri qarşısında and içməsi onun xalq və qanun qarşısında öhdəliklərini vurğulayır. Bu, dövlətin hüquq sisteminə və demokratik təsisatlarına dərin hörməti nümayiş etdirir. Həmçinin Azərbaycanın daxili sabitliyini möhkəmləndirir, eyni zamanda, beynəlxalq ictimaiyyətə Azərbaycan rəhbərliyinin davamlılığı və etibarlılığı barədə güclü siqnal verir, regionda təhlükəsizliyin və rifahın təmin edilməsi üçün əsas olan digər ölkələrlə etimadı və əməkdaşlığı təşviq edir. Prezident İlham Əliyevin davamlı rəhbərliyi Azərbaycan üçün iqtisadi və sosial inkişaf sahəsində yeni perspektivlər açır. Onun rəhbərliyi ilə ölkə müasirləşmə, innovasiya və dünya miqyasında rolunu gücləndirmək yolunda davam edə bilər.

“Azərbaycan Prezidentinin inauqurasiya mərasimindəki nitqi ölkənin daxili və xarici siyasəti ilə bağlı mühüm məsələlərin geniş spektrini əhatə edib. Prezident İlham Əliyev ölkənin gələcək inkişafının, xüsusən də iqtisadi və sosial rifah kontekstində mühüm əhəmiyyət kəsb etdiyini vurğulayıb, modernləşmə və infrastrukturun inkişafı istiqamətində səyləri davam etdirəcəyinə söz verərək, beynəlxalq əlaqələri və əməkdaşlığı gücləndirmək əzmində olduğunu bildirib. Prezident İlham Əliyevin davamlı rəhbərliyi sabitlik və tərəqqi vəd edir ki, bu da Azərbaycan xalqının dinc və firavan gələcəyini təmin etmək üçün son dərəcə vacibdir. Onun təcrübəsi və rəhbərliyi ölkənin strateji prioritetlərinin həyata keçirilməsində, o cümlədən hərbi sahənin modernləşdirilməsi, iqtisadi inkişaf, təhsil və səhiyyəyə dəstək kimi məsələlərdə mühüm rol oynayacaq”, - deyə Masil Dəmirov vurğulayıb.