Güclü ordu güclü dövlət deməkdir
Bakı, 26 iyun, AZƏRTAC
26 iyun Azərbaycan Respublikasının tarixində qürurverici və milli-mənəvi dəyərlərlə zəngin bir gündür. Bu gün müstəqil Azərbaycanın hərbi qüdrətini, xalqın orduya olan etimadını və dövlətin təhlükəsizliyinin təminatçısı olan Silahlı Qüvvələrin şərəfli yolunu təcəssüm etdirir. Hər il qeyd olunan Silahlı Qüvvələr Günü, həm ordunun keçdiyi tarixi yolun xatırlanması, həm də onun perspektivlərinin vurğulanması baxımından xüsusi əhəmiyyət daşıyır.
Bu sözləri AZƏRTAC-a açıqlamasında Milli Məclisin Ailə, qadın, uşaq məsələləri komitəsinin sədr müavini Jalə Əliyeva söyləyib.
O qeyd edib ki, Azərbaycan Silahlı Qüvvələrinin yaranma tarixi 1918-ci ilin 26 iyununa – Azərbaycan Xalq Cümhuriyyətinin dövrünə təsadüf edir. Həmin gün Cümhuriyyət hökumətinin qərarı ilə ordu quruculuğuna başlanıldı və ilk nizami hərbi hissələr təşkil olundu. Milli Ordunun əsasını təşkil edən bu birliklər Azərbaycan xalqının müstəqilliyini və ərazi bütövlüyünü qorumaq məqsədi daşıyırdı. Lakin 1920-ci ildə sovet işğalı nəticəsində Cümhuriyyət süqut etdi və milli ordu buraxıldı.
Müstəqilliyini yenidən bərpa edən Azərbaycan Respublikası 1991-ci ildə Silahlı Qüvvələrinin yenidən formalaşdırılmasına başladı. 1991–1993-cü illərdə ordunun təşkili çətinliklərlə müşayiət olunsa da, 1993-cü ildə Ümummilli Lider Heydər Əliyevin hakimiyyətə qayıdışı ilə Azərbaycan Ordusu keyfiyyətcə yeni mərhələyə qədəm qoydu. Heydər Əliyev ordu quruculuğunu dövlət siyasətinin əsas prioritetlərindən birinə çevirdi.
Jalə Əliyeva bildirib ki, bu gün Azərbaycan Ordusu regionun ən güclü hərbi qüvvələrindən biri hesab edilir. Prezident, Ali Baş Komandan İlham Əliyevin rəhbərliyi ilə son illərdə orduya göstərilən diqqət və dəstək nəticəsində hərbi texnika, silah-sursat, kadr hazırlığı və döyüş qabiliyyəti baxımından böyük inkişaf müşahidə olunur.
Xüsusilə 2020-ci ildə 44 günlük Vətən müharibəsi Azərbaycan Ordusunun gücünü, vətənpərvərliyini və strateji üstünlüyünü bütün dünyaya nümayiş etdirdi. 30 ilə yaxın Ermənistanın işğalı altında olan torpaqlar bu müharibə nəticəsində azad olundu, ölkənin ərazi bütövlüyü təmin edildi. Bu, yalnız güclü ordu və milli birliyin nəticəsi idi.
Azərbaycan Respublikasının dövlət büdcəsindən hər il orduya ayrılan vəsaitin artması, hərbi qulluqçuların sosial rifahının yaxşılaşdırılması və peşəkar kadrların hazırlanması istiqamətində atılan addımlar Silahlı Qüvvələrin daha da güclənməsinə şərait yaradır. Ən müasir silahlar, pilotsuz uçuş aparatları, hava hücumundan müdafiə sistemləri və texnologiyalar ordunun arsenalına daxil edilibr.
Bundan başqa, hərbi hissələrin müasir standartlara uyğun inşası, hərbi təlimlərin təşkili, beynəlxalq hərbi əməkdaşlıq və NATO standartlarına uyğunlaşma Azərbaycan Ordusunu peşəkarlıq baxımından daha da gücləndirir.
Komitəsinin sədr müavini qeyd edib ki, 26 İyun Azərbaycan xalqı üçün sadəcə rəsmi bayram deyil, həm də Vətənə sevgi, orduya inam və milli birliyin simvoludur. Hər il bu tarixdə ölkənin müxtəlif bölgələrində hərbi paradlar, sərgilər, tədbirlər təşkil olunur. Qəhrəman şəhidlərin xatirəsi ehtiramla yad edilir, qazilərə və hərbi qulluqçulara hörmət göstərilir.
Bu gün Azərbaycan gəncləri üçün nümunə olan ordu vətənpərvərlik ruhunun gücləndirilməsi baxımından da xüsusi əhəmiyyət kəsb edir. Gənclərin orduya könüllü axını, hərbi xidmətə məsuliyyətlə yanaşmaları gələcəyin daha güclü Azərbaycan Ordusunu formalaşdırır.
“26 İyun – Silahlı Qüvvələr Günü Azərbaycanın dövlətçiliyinin, müstəqilliyinin və gücünün bariz göstəricisidir. Bu gün biz təkcə ordumuzu deyil, eyni zamanda dövlətimizin suverenliyini, xalqımızın birliyini və gələcəyə olan inamını təntənə ilə qeyd edirik. Güclü ordu güclü dövlət deməkdir. Azərbaycan Ordusu bu gün yalnız regionda deyil, beynəlxalq səviyyədə də nüfuz sahibi olan güc mərkəzinə çevrilib”, - deyə o əlavə edib.
Bölmənin digər xəbərləri
