Gürcüstan azərbaycanlıları bəzi KİV-lərdə yayımlanan məlumatları təkzib etmişlər
Marneuli, 26 iyun (AZƏRTAC). Marneulidəki Azərbaycanlıların Mədəniyyət Mərkəzində son vaxtlar bəzi kütləvi informasiya vasitələrində, ayrı-ayrı sosial şəbəkələrdə Gürcüstan azərbaycanlıları adından yayımlanan məlumatlarla bağlı tədbir keçirilmişdir.
Mədəniyyət Mərkəzinin rəhbəri Fazil Həsənov azərbaycançılıq ideyalarına zidd olan və Azərbaycan-Gürcüstan dostluğuna xələl gətirmək məqsədi güdən belə cızma-qaraların müəyyən qrup şəxslərə xidmət etdiyini bildirmişdir.
Professor Mahmud Kamaloğlu, Gürcüstanın Azərbaycanlı Gənclər İttifaqının sədri Leyla Məmmədova, Azərbaycanlıların Mədəniyyət Mərkəzi gənclər şöbəsinin rəhbəri Nərgiz Əliyeva, ziyalılardan Binnət Əlioğlu, Zahid Nəsibov, Suddarxan Kazımov, Tapdıq İsmayılov və başqaları bu cür əməlləri pisləmiş, belə uydurma məlumatları Gürcüstan-Azərbaycan münasibətlərinin inkişafını, Azərbaycanın beynəlxalq aləmdə artan nüfuzunu gözü götürməyənlərin yaydıqlarını vurğulamışlar.
Sonda tədbir iştirakçıları bəyanat qəbul etmişlər. Bəyanatda deyilir ki, son vaxtlar bəzi KİV-lərdə və sosial şəbəkələrdə Gürcüstan azərbaycanlılarının adından yayımlanan bəyanatlar və qərəzli məlumatlar heç bir həqiqəti əks etdirmir və bizdə təəccüb və təəssüf doğurur. Bəzi şəxslər cəmiyyətdə heç bir nüfuzu və sosial dayaqları olmayan, qondarma bir təşkilatın rəhbərləri kimi xarici ölkələrdəki havadarlarının təhriki ilə strateji əməkdaşlıq, dostluq və qardaşlıq səviyyəsinə yüksəlmiş Azərbaycan-Gürcüstan münasibətlərinə düşünülməmiş və məsuliyyətsiz çıxışları ilə kölgə salmağa, bununla da dünya birliyinə inteqrasiya məqsədini hədəf götürmüş ölkələrimizin dostluğuna qara yaxmağa çalışırlar.
Bildiririk ki, ümummilli liderimiz Heydər Əliyev ideyalarına sadiq qalan, onun şəxsiyyətinə daim hörmətlə yanaşan Gürcüstan azərbaycanlıları özünün dövlətçilik ənənələrinə həmişə sədaqətləri ilə fəxr etmiş, minillik tarixə malik və Ulu Öndərimiz tərəfindən zirvəyə qaldırılmış mehriban dostluq və qardaşlıq münasibətlərinin qorunub saxlanması ilə qürur duymuşlar.
Gürcüstan azərbaycanlıları bir daha bəyan edirlər ki, heç bir təxribata uymayan uzaqgörən Azərbaycan xalqı yaxşını yamandan seçməyi bacarır. İctimai rəyi öz xeyrinə dəyişməyə və bu yolda heç nəyi əsirgəməməyə çalışan şər qüvvələr bu dəfə də öz niyyətlərinə çatmayacaq, ağıl-kamal nümayiş etdirən xalq yenə də müdriklik göstərəcək, Prezident İlham Əliyevin ətrafında sıx birləşərək doğma Azərbaycanımızın daha da çiçəklənməsi və parlaq gələcəyi naminə bütün qüvvə və bacarığını sərf edəcəklər.
İslam Əliyev
AZƏRTAC-ın xüsusi müxbiri
Marneuli
Bölmənin digər xəbərləri
