Bakı, 21 may (AZƏRTAC). Xəbər verdiyimiz kimi, mayın 20-də “Gülüstan” sarayında Azərbaycan Respublikasının Prezidenti İlham Əliyevin adından Gürcüstan Prezidenti Mixeil Saakaşvilinin şərəfinə rəsmi ziyafət verilmişdir.

Dövlət başçıları ziyafətdə nitq söyləmişlər.

Azərbaycan Prezidenti İLHAM ƏLİYEV Gürcüstan dövlətinin

başçısını və nümayəndə heyətini salamlayaraq dedi:

-Hörmətli cənab Prezident!

Hörmətli qonaqlar, xanımlar və cənablar!

Gürcüstan Prezidentini və qonşu qardaş ölkənin bütün nümayəndə heyətini Azərbaycanda bir daha salamlamaq istəyirəm.

Bu gün biz çox səmərəli danışıqlar apardıq və bu danışıqlar çərçivəsində ikitərəfli əməkdaşlığın uğurları təhlil olundu, həmçinin münasibətlərimizin inkişaf yolları müəyyən edildi.

Ölkələrimiz arasında münasibətlərin tarixi çox qədimdir. Xalqlarımız həmişə yanaşı, qonşuluqda, sülh və mehribanlıq şəraitində yaşamış, həmişə bir-birinə kömək etmişlər. Bu gün iki müstəqil dövlətin inkişafına, əməkdaşlığa və həm təhlükəsizliyimizi, həm də iqtisadi firavanlığımızı təmin edən, qlobal dünya prosesləri üçün böyük əhəmiyyətə malik olan layihələrdə iştirakına kömək edən münasibətlərin möhkəm təməli budur.

Bizim ikitərəfli münasibətlər çox möhkəm və proqnozlaşdırıla biləndir, zənnimcə, gələcəkdə də belə qalacaqdır. Biz əlaqələrimizin gündəliyini konkret işlərlə genişləndirməli, diqqəti operativ həll olunması tələb edilən məsələlər üzərində cəmləşdirməliyik. Biz bu gün məhz bu cür etdik, ölkələrimizin iqtisadiyyatı üçün, enerji təhlükəsizliyi, nəqliyyat təhlükəsizliyi üçün böyük əhəmiyyətə malik məsələlər barəsində bizdə tam anlaşma var. Ölkələrimizin fəal iştirakı ilə regionda çox iri infrastruktur layihələri həyata keçirilmişdir, indi onlar artıq qlobal miqyaslı gələcək layihələr üçün bazadır. Bu, ilk növbədə, energetikaya aiddir.

Bu gün biz həmin sahədə əməkdaşlığın miqyasını daha da genişləndirmək üçün əlavə konkret addımları müzakirə etdik. Neft və qaz sahəsi ilə yanaşı, elektroenergetika sahəsində əməkdaşlıq da böyük maraq doğurur. Burada çox böyük potensial mövcuddur və bizim imkanlarımız bir-birini tamamlayır. Biz elektrik enerji dəhlizinin mövcud neft-qaz dəhlizlərini tamamlaması üçün ciddi səy göstərəcəyik.

Biz ölkələrimizin nəqliyyat təhlükəsizliyinin təmin edilməsi prosesində fəal iştirak edirik. Gürcüstan və Azərbaycan Qərb ilə Şərq arasında nəqliyyat kommunikasiyalarının mühüm hissəsidir. Bu, təkcə coğrafiya deyil, həm də infrastruktur sahəsində qazanılmış nailiyyətlərdir. Başqa sözlə, biz iqtisadi sahədə nəzərdə tutduqlarımızın hamısını yerinə yetiririk.

Gürcüstan dinamik inkişaf edən, həm siyasi, həm də iqtisadi islahatların fəal həyata keçirildiyi islahatçı ölkə kimi investorlar üçün çox böyük maraq doğurur. Əlbəttə, mən çox şadam ki, Azərbaycan şirkətləri, ilk növbədə, ARDNŞ Gürcüstanın çox mühüm investorlarından biridir. ARDNŞ-in sərmayələri artıq bu gün yüz milyonlarla ölçülür, gələcəkdə isə yəqin ki, milyardlarla ölçüləcəkdir. Bunlar həm yanacaqdoldurma stansiyaları şəbəkəsi, həm neft məhsulları satışı, həm Gürcüstanın qazlaşdırılması, həm də təbii qazla təmin edilməsidir.

Biz Gürcüstanın enerji təhlükəsizliyini tam təmin etmək və qış dövründə qaz ehtiyatlarından daha səmərəli istifadə etmək üçün gələcəkdə qaz anbarları tikilməsi məsələlərini müzakirə etdik. Bununla da, gələcək layihələr üçün artıq bu gün baza olan tamamilə yeni regional şərait yaranır. Bu yaxınlarda Gürcüstan Prezidenti və digər həmkarlarımızla birlikdə Praqada enerji dəhlizinə həsr edilmiş konfransda iştirak etdik. Heç kəsə sirr deyil ki, müzakirə olunan layihələr üçün əsas bizim birlikdə həyata keçirdiyimiz layihələrdir. Bu, Bakı-Tbilisi-Ceyhan neft boru kəməridir, həmin kəmər olmasaydı, Bakı-Tbilisi-Ərzurum qaz kəmərinin tikintisi mümkün olmazdı, - bu, Bakı-Supsa boru kəməridir. Bu istiqamətdə gələcək addımlar da bugünkü infrastruktur layihələrinə əsaslanır. Biz onları birlikdə həyata keçirmişik və təbii ki, bu bizə inam verir. Bu, belə layihələri artıq öz ölkələrimizdə həyata keçirmək üçün yaxşı təcrübədir.

Biz bundan sonra da infrastruktur, investisiya layihələrində fəal iştirak etmək niyyətindəyik. Gürcüstanda təkcə energetikada deyil, həm də nəqliyyat sahəsində, turizm sahəsində, servis sahəsində - bütün istiqamətlərdə yaxşı potensial imkanlar var.

Humanitar sahədə əməkdaşlıq da inkişaf edir. Bu da ölkələrimiz üçün çox böyük əhəmiyyətə malikdir. Bizim Gürcüstanda yaşayan azərbaycanlı qardaşlarımızın gürcü dilini də öz ana dili kimi bilməsi, onların Gürcüstan cəmiyyətinə fəal inteqrasiya etməsi, Gürcüstanın inkişafında layiqli yer tuta bilməsi və daha fəal iştirak etməsi çox vacibdir.

Gürcüstan və Azərbaycan hərəsi öz yolu ilə - inkişaf, tərəqqi yolu ilə gedən iki qonşu ölkə, iki qardaş ölkə, iki müstəqil ölkədir. Bizim nəzərdə tutduqlarımızı tam həcmdə təmin etmək üçün, əlbəttə, regionda sülh olmalıdır. Fikrimcə, bu, belə də olacaqdır. Biz buna çalışırıq və fikrimcə, buna nail olacağıq.

Mən gürcüstanlı qonaqlarımıza ən xoş arzularımı bildirmək, qardaş gürcü xalqına dərin hörmətimi ifadə etmək və bu badəni Gürcüstan Prezidentinin sağlığına, gürcü xalqının, bizim dostluğumuzun şərəfinə qaldırmaq istəyirəm.

X X X

Gürcüstan Prezidenti MİXEİL SAAKAŞVİLİ Azərbaycan dövlətinin başçısına müraciətlə dedi:

-Hörmətli İlham Heydər oğlu,

hörmətli dostlar!

Bakıya gəlmək mənim üçün fərəhli nümunə, ünsiyyət deməkdir. Mən buraya həmişə məmnuniyyətlə gəlirəm və buradan böyük təəssüratla ayrılıram.

İndicə biz Bakının yeni məhəllələrini, genişləndirilmiş yeni küçələrini gəzdik, yeni parklara baxdıq. Məncə, burada baş verənlər bizim üçün nümunə və ilham mənbəyidir. Əgər Azərbaycan bizim arxamızda dayanmasaydı, bilmirəm biz indi harada olardıq və ümumiyyətlə mövcud olardıqmı?

Gürcüstan Prezidenti Azərbaycanın müstəqilliyinin möhkəmləndirilməsində ulu öndər Heydər Əliyevin siyasi müdrikliyinin və Prezident İlham Əliyevin cəsarətli addımlarının həlledici rolundan danışdı.

O, Azərbaycan Prezidenti İlham Əliyevin təkcə region üçün deyil, bütövlükdə dünya üçün, Avropa üçün çox böyük siyasi xadim olduğunu vurğuladı.

M.Saakaşvili qeyd etdi ki, qonşu dövlət kimi Azərbaycan cətin anlarda Gürcüstana işıq və qaz vermişdir. Gürcü xalqı bunu heç zaman unutmayacaqdır.

Gürcüstanın dövlət başçısı dedi ki, bizi bağlayan tellər təkcə neft kəməri, elektrik xətləri deyil, insanlar arasındakı əlaqələrdir.

Nitqinin sonunda Mixeil Saakaşvili Azərbaycan xalqına və Azərbaycanın dövlət başçısına ən xoş arzularını çatdırdı.