HƏRBİ QULLUQÇULARIN SOSİAL MÜDAFİƏSİ GÜCLƏNDİRİLİR
AZƏRTAC xəbər verir ki, Milli Məclisin təhlükəsizlik və müdafiə məsələləri daimi komissiyasının oktyabrın 5-də keçirilmiş iclasında “Dövlət sirri haqqında” Qanunun tətbiqi ilə əlaqədar Azərbaycan Respublikasının bəzi qanunvericilik aktlarına dəyişikliklər və əlavələr edilməsi barədə” və “Hərbi qulluqçuların dövlət icbari şəxsi sığortası haqqında” Qanuna dəyişikliklər və əlavələr edilməsi barədə” qanun layihələri müzakirə edilmişdir. Milli Məclis sədrinin birinci müavini, komissiyanın sədri Ziyafət Əsgərov demişdir ki, “Dövlət sirri haqqında” Qanunun tətbiqi ilə əlaqədar “Azərbaycan Respublikasının Silahlı Qüvvələri haqqında”, “Hərbi qulluqçuların statusu haqqında”, “Müdafiə haqqında” qanunlara bir sıra dəyişikliklərin edilməsi nəzərdə tutulur. Bu dəyişikliklər dövlət sirrinin mühafizəsi ilə bağlıdır. “Hərbi qulluqçuların dövlət icbari şəxsi sığortası haqqında” Qanuna təklif olunan dəyişikliklər isə hərbi qulluqçuların sosial müdafiəsinin gücləndirilməsinə xidmət edir. Qanun layihəsinin sığorta hadisələri və ödənişlərlə bağlı hissəsi əsaslı surətdə dəyişdirilmiş, sığorta məbləğləri artırılmışdır. Komissiya sədrinin sözlərinə görə, dövlətimizin iqtisadi imkanları gücləndikcə Silahlı Qüvvələrə diqqət və qayğı da artır. Bu cür tədbirlər gələcəkdə də davam etdiriləcəkdir.
Bölmənin digər xəbərləri
