IDEA Kampaniyası 3-cü Beynəlxalq “Xəzər: ətraf mühit üçün texnologiyalar” sərgisində iştirak edir
Bakı, 21 noyabr (AZƏRTAC). Bakı Ekspo Mərkəzində təşkil olunan 3-cü Beynəlxalq “Xəzər: ətraf mühit üçün texnologiyalar” (CTE-2012) sərgisində Heydər Əliyev Fondunun vitse-prezidenti Leyla xanım Əliyeva tərəfindən 2011-ci il iyulun 12-də başladılmış Ətraf Mühitin Mühafizəsi üzrə Beynəlxalq Dialoq Kampaniyasının (IDEA) stendi nümayiş etdirilir.
AZƏRTAC xəbər verir ki, bu, öz fəaliyyətində ekoloji maarifləndirməni daim rəhbər tutan IDEA Kampaniyasının növbəti beynəlxalq səviyyəli addımlarından biridir.
Sərginin əsas məqsədi Azərbaycanda həyata keçirilən ekoloji layihələrə beynəlxalq və yerli ictimaiyyətin diqqətini cəlb etmək, eləcə də ekoloji sahədə fəaliyyət göstərən yerli və beynəlxalq təşkilatlar arasında əməkdaşlığın yaranmasına nail olmaqdır.
Stenddə IDEA Kampaniyası tərəfindən həyata keçirilən layihələr haqqında hesabatı əks etdirən müxtəlif nəşrlərlə yanaşı, digər vəsaitlər də qonaqlara paylanılır. Qonaqlar, həmçinin layihələrlə bağlı IDEA Kampaniyasının nümayəndələri tərəfindən daha ətraflı məlumat ala bilərlər.
Bölmənin digər xəbərləri
