İLK DƏFƏ ŞAHMAT MƏŞQÇİLƏRİNİN SEMİNARI KEÇİRİLİR

05.04.2004 [18:42]
Çap et
A⁺ A^-

Son illər respublikamızda şahmatın geniş inkişafı, Azərbaycan şahmatçılarının dünya və Avropa çempionatlarındakı uğurları ölkəmizin müxtəlif bölgələrində idmanın bu qədim növünə marağı daha da artırmışdır. Şahmat məktəblərinə yeniyetmələrin axını ilbəil çoxalır. Ona görə də şahmat məktəblərində müasir tələblərə cavab verən məşqlərin keçirilməsi ən vacib məsələlərdən biridir.

Azərbaycan Şahmat Federasiyasından AZƏRTAC-ın müxbirinə bildirmişlər ki, bu məqsədlə federasiyanın təşəbbüsü ilə, aprelin əvvəlində ilk dəfə ölkəmizin şahmat məktəbləri məşqçilərinin seminarı keçirilir. Təhsil Nazirliyi ilə birgə keçirilən seminarda 36 şəhər və rayonun şahmat məşqçiləri 1 həftə ərzində ölkəmizin təcrübəli məşqçilərinin rəhbərliyi altında məşq proseslərinin lazımi səviyyədə aparılması, şahmatçıların nəzəri, praktiki, psixoloji hazırlığı və s. barədə təlimatlar alacaq, məşqçilik təcrübələrini artıracaqlar. Seminarın son günü Təhsil Nazirliyi tərəfindən iştirakçılara sertifikat veriləcəkdir.

Federasiya və nazirlik aprel ayında Bakıda 10 nəfər istedadlı yeniyetmə şahmatçının təlim-məşq toplanışını da keçirəcəkdir.