İLLİK STATİSTİKA HESABATLARININ TƏQDİMATI
Qadın Problemləri üzrə Dövlət Komitəsində “Azərbaycanda qadınlar və kişilər”, “Azərbaycanda uşaqlar” statistika toplularının təqdimatı olmuşdur. Komitənin sədri Zəhra Quliyeva bildirmişdir ki, toplular ölkə Prezidentinin “Azərbaycan Respublikasında dövlət qadın siyasətinin həyata keçirilməsi haqqında” 2000-ci il 6 mart tarixli Fərmanına uyğun olaraq Dövlət Statistika Komitəsi tərəfindən hazırlamışdır.
“Azərbaycanda qadınlar və kişilər” toplusunda demoqrafiya, səhiyyə, təhsil, məşğulluq və işsizlik sahələrinə, cinayətkarlığın səviyyəsinə, hakimiyyət orqanlarında təmsil olunmağa, ictimai-siyasi həyatda iştiraka dair gender statistikası təqdim edilmişdir.
“Azərbaycanda uşaqlar” toplusunda cins və yaş kateqoriyalarına, uşaq ölümünün səviyyəsi, qaçqın və məcburi köçkün uşaqların sayı, məktəbəqədər tərbiyə və orta ümumtəhsil müəssisələri, müalicə-profilaktika yardımı ilə əhatə dərəcəsi, cinayətkarlıq üzrə demoqrafik göstəricilərin statistikası verilmişdir.
Hesabatlardakı informasiyalar Azərbaycan və ingilis dillərindədir.
Dövlət Statistika Komitəsinin şöbə müdiri Rəna Lazımova və komitənin digər əməkdaşları topluların ayrı-ayrı müddəalarını şərh etmişlər.
Bildirilmişdir ki, qadınlar ölkə əhalisinin 51 faizini və ya 4 milyon 178 min nəfərini təşkil edirlər. Onların 51 faizi şəhərlərdə yaşayır. 2002-ci ilin statistika məlumatında doğumun azaldığı da göstərilir ki, bu da nəsilvermə qabliyyətinə malik qadınların yaş struktrunun dəyişməsi ilə bağlıdır. Təhsil sahəsində isə yüksək göstəricilər müşahidə olunur: qadınların təxminən 90 faizi ali və orta ixtisas təhsillidir.
Bölmənin digər xəbərləri
