İmişlidə barama tədarükü - kümçülər qısa vaxtda 2 tondan çox məhsul təhvil veriblər VİDEO
İmişli, 10 iyun, Aydın Yavərzadə, AZƏRTAC
İmişli kümçüləri bir neçə gündür barama tədarükünə başlayıblar.
AZƏRTAC-ın bölgə müxbiri xəbər verir ki, rayon üzrə bu günə kimi 2 tondan çox yaş barama təhvil verilib.
İlham Cəfərov da bu il ipəkqurdu bəsləyib. Deyir ki, baramaçılıq maraqlı və gəlirli sahədir: "Ötən ay 60 qram toxum təhvil aldım. Bəslənmə dövrü bitib, qurdlar artıq pup sarıma mərhələsindədir. Qurdların böyüməsi, hərəkət etməsi və pup sarıması üçün rəflər hazırladıq. İndi zəhmətimizin bəhrəsini toplayırıq, təxminən 150-160 kiloqram yaş barama təhvil verəcəyəm. Artıq ilk məhsulumuzu tədarük etmişik".
İpəkqurdu bəsləyən Famil Əhmədov da bir neçə ildir hər mövsüm barama saxlamaq üçün toxum təhvil alır. Onun sözlərinə görə, baramaçılıq qısa vaxt ərzində əlavə qazanc əldə etmək üçün çox faydalı sahədir. “Ötən illərə nisbətən bu mövsüm daha çox - altı qutu toxum götürdüm. Bu il hava şəraiti də yaxşı olduğu üçün qurdların böyüməsi tezləşdi, ötən il 37-38 gün ərəfəsində yaş barama təhvil vermişdimsə, bu il 32-ci günündə artıq qurdlar tam pup sarıma halına keçdi və məhsulu toplayaraq təhvil verdim", - deyə o əlavə edir.
Digər kümçü Əzimi İsmayılzadə isə indiyədək 35-40 kiloqram məhsul təhvil verib. O, bu mövsüm 120-130 kiloqram yaş barama tədarük etməyi planlaşdırır.
İmişli rayon Dövlət Aqrar İnkişaf Mərkəzindən verilən məlumata görə, bu il rayonda 80 kümçüyə 150 qutu toxum paylanılıb və ümumilikdə 6 tona yaxın yaş barama tədarükü gözlənilir. Baramaçılığın inkişafı üçün yem bazası kimi mövcud tut bağlarından istifadə edilib və rayon ərazisində Çin və yerli mənşəli çəkil ağacları var.
Ötən il İmişli kümçüləri tərəfindən 4 tondan çox yaş barama yığılaraq təhvil verilmişdi.
Bölmənin digər xəbərləri
