İmmun sisteminin təbii stimulyatoru açıqlanıb
Bakı, 18 oktyabr, AZƏRTAC
Hil toxumlarının ekstraktı orqanizmin təbii müdafiə mexanizmlərini aktivləşdirə və virus infeksiyalarına qarşı immun cavabını gücləndirə bilər. Sinsyu Universitetinin alimləri “S&B Foods” şirkəti ilə birgə apardıqları tədqiqat zamanı bu nəticəyə gəliblər.
AZƏRTAC xəbər verir ki, araşdırmanın nəticələri “Foods” elmi jurnalında dərc olunub.
Tədqiqatçılar müəyyən ediblər ki, hilin isti suda hazırlanmış ekstraktı, həmçinin onun əsas aktiv komponenti olan 1,8-sineol I tip interferonların istehsalını stimullaşdırır. Bu siqnal molekulları orqanizmin təbii immun sistemində mühüm rol oynayır, belə ki, onlar hüceyrələrə virusa yoluxmuş RNT və DNT-ni aşkar etməyə, daha sonra isə yoluxmanın erkən mərhələsində virusların çoxalmasını bloklamağa kömək edir.
İnsanın ağciyər toxumasının hüceyrələri üzərində aparılmış laboratoriya təcrübələrində alimlər müəyyən ediblər ki, ədviyyatlardakı təbii birləşmələr belə, farmakoloji preparatların təsirinə bənzər mürəkkəb immun reaksiyalarını işə sala bilir. Bununla yanaşı, hil sintetik vasitələrdən fərqli olaraq yüksək təhlükəsizlik profilinə malikdir və qidaların və ya bioloji aktiv əlavələrin tərkibində istifadə oluna bilər.
Müəlliflər vurğulayırlar ki, bu kəşf virus xəstəliklərinin profilaktikası üçün, xüsusən də virus əleyhinə ənənəvi preparatlara davamlılığın artdığı şəraitdə yeni imkanlar açır. Bununla belə, hilin müalicəvi vasitə kimi tövsiyə olunmasından əvvəl əlavə klinik tədqiqatların aparılması zəruridir.
Bölmənin digər xəbərləri
