Əmman, 16 sentyabr (AZƏRTAC). “Son illər xalq diplomatiyası dünyada getdikcə daha fəal rol oynayır, Azərbaycan səfirliklərinin təmsil etdiyi rəsmi diplomatiyanın mühüm əlavəsinə çevrilir. İordaniya-Azərbaycan Dostluq Cəmiyyəti iki qardaş ölkə arasında münasibətlərin möhkəmlənməsində və dərinləşməsində əhəmiyyətli rol oynayır”. Bu sözləri İordaniya-Azərbaycan Dostluq Cəmiyyətinin Qadınlar Komitəsinin sədri Zümrüd Dadaşova AZƏRTAC-ın müxbirinə müsahibəsində söyləmişdir.

2008-ci ildə yaradılmış Dostluq Cəmiyyətinin fəaliyyətindən söz açan Zümrüd Dadaşova qeyd etmişdir ki, ötən dövr ərzində bu ictimai təşkilat çoxlu ideya və layihə həyata keçirmiş, İordaniya cəmiyyətinin və diasporumuzun iştirakı ilə təşkil olunan görüşlər və müxtəlif tədbirlər üçün foruma çevrilmişdir. Onun sözlərinə görə, Cəmiyyətin dəyişməz sədri, İordaniya Senatı sədrinin müavini Mərvan əl-Hmud təşkilatın uğurla fəaliyyət göstərməsinə misilsiz töhfələr verir, dostluq münasibətlərimizin inkişafı üçün mümkün olan hər şeyi edir.

Komitə başçısı bildirmişdir ki, təşkilat öz fəaliyyəti çərçivəsində təhsil, dil, sosial və humanitar yönümlü layihələri dəstəkləyir, həmvətənlərimizin başqa maraqlarını təmin edir.

Onun sözlərinə görə, mədəniyyətin, dilin və xalq ənənələrinin, habelə həmvətənlərimizin milli bənzərsizliyin qorunub saxlanılması işi qurumun fəaliyyətinin əsas istiqamətlərindən biridir. Z.Dadaşova demişdir: “Cəmiyyət Azərbaycanın İordaniyadakı səfirliyi ilə sıx əməkdaşlıq şəraitində işləyir. Səfirlik cəmiyyətin bütün təşəbbüslərini fəal dəstəkləyir, onun hərtərəfli fəaliyyət göstərməsinə, bu və ya digər məqsədlərə nail olmasına, xüsusən, Azərbaycan gerçəkliklərinin təbliği, ölkəmiz barədə obyektiv informasiyanın çatdırılması - ilk növbədə Dağlıq Qarabağ, Ermənistan-Azərbaycan münaqişəsi, Xocalı faciəsi, Qara Yanvar hadisələri və xalqımızın ictimai əhəmiyyət daşıyan digər xatirə günləri barədə İordaniya cəmiyyətinin daha geniş məlumatlandırılması məsələlərində Cəmiyyətə hər cür dəstək göstərir. Milli bayramların qeyd olunması, kitab təqdimatları, konfranslar, ictimaiyyətlə görüşlər, habelə xalqımızın milli-mədəni ənənələri ilə tanış edən ayrı-ayrı tematik tədbirlər birgə keçirilmiş tədbirlər arasındadır. Bütün bu təşəbbüsləri dəstəkləyən, Cəmiyyətin bütün iclaslarında iştirak edən, bu və ya digər layihə təşəbbüsü ilə çıxış edən, onları həyata keçirən və digər yardımlar göstərən Azərbaycan səfiri Sabir Ağabəyova böyük minnətdarlığımı bildirmək istəyirəm”.

Z.Dadaşovanın fikrincə, dövlət başçılarımız - Prezident İlham Əliyevin və Kral II Abdullanın səmimi dostluq münasibətləri sayəsində yüksək səviyyədə olan xalqlarımız arasında dostluq münasibətlərinin möhkəmləndirilməsi cəmiyyətin fəaliyyətinin başlıca istiqamətidir. O demişdir: “Yüksək səviyyəli münasibətlər xalqlarımız arasında qarşılıqlı fəaliyyətin ümumi ab-havasına müsbət təsir göstərir, həmvətənlərimizin yaşayışı üçün rahat şərait və əmin-amanlıq rejimi yaradır. Fəallarımız isə İordaniya ilə Azərbaycan arasında tərəfdaşlığı və əməkdaşlığı bütün istiqamətlərdə dərinləşdirmək üçün böyük yaradıcı potensialdan maksimum istifadə etməyə çalışırlar. Xüsusi tədbirlər proqramı və birgə fəaliyyət planı mərhələli şəkildə həyata keçirilir”.

Komitə sədri Z.Dadaşova sonda demişdir: “Bir sözlə, Cəmiyyətimizin məqsədləri - milli-mədəni maraqların həyata keçirilməsinə dəstək göstərilməsi, İordaniya ilə Azərbaycan arasında dostluğun hərtərəfli möhkəmləndirilməsi, xüsusən iki ölkə arasında dərin humanitar və mədəni əlaqələrin inkişaf etdirilməsi planlı şəkildə həyata keçirilir. Ümummilli lider Heydər Əliyevin dediyi kimi, “harada yaşayırlarsa yaşasınlar, azərbaycanlılar bir-biri ilə bağlı olmalı, bir-biri ilə əlaqə saxlamalıdırlar”. Dünya miqyaslı böyük dövlət xadiminin bu sözləri İordaniya-Azərbaycan Dostluq Cəmiyyətinin yarandığı vaxtdan bu günədək yerinə yetirdiyi bu nəcib missiyanı çox gözəl əks etdirir və bu iş davam etdiriləcəkdir”.

Asya Hacızadə

AZƏRTAC-ın xüsusi müxbiri

Əmman