İrəvanın hiyləgər siyasətini dəstəkləyən riyakarlar regionda yeni münaqişə ocağı yaratmağa cəhd edirlər - ŞƏRH
Bakı, 7 fevral, AZƏRTAC
“Azərbaycan Ordusunun Ermənistan üzərindəki tarixi Qələbəsindən sonra dünya ictimaiyyəti düşünürdü ki, məğlub ölkə bundan sonra işğalçılıq siyasətindən əl çəkəcək, məğlubiyyətini qəbul edəcək, qonşu dövlətlərlə münasibətləri yaxşılaşdırmaq barədə düşünəcək və Azərbaycanla sülh müqaviləsinə imza atacaq. Lakin Ermənistan bundan nəticə çıxarmadı və yenidən müharibə ehtimalını nəzərdən keçirməyə başladı. SSRİ-nin süqutundan sonra öz müstəqilliyini Rusiyanın boyunduruğunda “tapan” Ermənistan illər sonra gah Fransanın, gah da Avropa İttifaqının qoltuğuna sığındı. Bunlardan da istədiyi faydanı əldə edə bilmədiyindən ABŞ-a üz tutdu. Əslində, rəsmi İrəvanın işğalçı Fransa və Qərblə “əməkdaşlıq görüntüsü” yaratmaqda məqsədi yeni silahlar əldə edərək regionda təhdidlər, münaqişələr yaratmaq idi. Halbuki, Ermənistan üçün ən düzgün yol Azərbaycanla sülh müqaviləsi bağlamaqdır”.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, artıq beynəlxalq ictimaiyyətə də bəllidir ki, Avropa İttifaqının Ermənistandakı mülki müşahidə missiyasının mandatı daha iki il müddətinə – 2027-ci il fevralın 19-dək uzadılıb. Missiya 2023-cü ilin əvvəlindən fəaliyyət göstərsə də, indiyə qədər heç bir müsbət nəticə əldə edilməyib. Əksinə, müşahidəçilərin sayı artırılaraq 210-a çatıb. Bu isə bölgədəki gərginliyi daha da artırır. Guya, müşahidə missiyasının əsas vəzifəsi bölgədə sülhü təmin etməkdir. Əslində isə əksəriyyəti keçmiş kəşfiyyatçılardan ibarət olan hərbi casus missiyası Ermənistanın silahlandırılmasına və yeni münaqişəyə hazırlamasına xidmət edir. Avropa İttifaqının Ermənistandakı casus missiyası Azərbaycanla şərti sərhəddə pozuculuq fəaliyyətini davam etdirir.
Siyasi sərhçi aralarında fransız legionerlərin də olduğu avropalı casuslardan söhbət açaraq bildirib ki, onlar Ermənistan ordusunu silahlandırmaqla yenidən müharibə təhlükəsi yaratmağa çalışırlar: “Təbii ki, istəklərinə nail ola bilməyəcəklər. Çünki həm Ermənistan, həm də onun havadarları Azərbaycan Ordusunun gücünə bələddir və “dəmir yumruğ”un dadını unutmamış olmazlar. Ermənistan rəhbərliyi Fransa kimi işğalçı bir ölkənin fitnə-felinə aldanmaq və Avropa İttifaqının missiyasına ümid etmək əvəzinə, Azərbaycanla birbaşa sülh danışıqlarını davam etdirməli və buna nail olmalıdır. Bu, məğlub ölkənin gələcəyi üçün daha məqsədəuyğundur. Əks halda, yeni müharibə ssenariləri gündəmə gələ bilər və bu dəfə Ermənistan uzun müddət özünə gələ bilməyəcək. 2023-cü ildən fəaliyyətə başlayan Avropa İttifaqı missiyasının regionda sülhə töhfə vermədiyi açıq şəkildə özünü büruzə verir”.
Ə.Bədəlov Ermənistanın Rusiya, Fransa və Avropa İttifaqından özünə sərf edən “xoşbəxtliyi” tapa bilmədiyindən bu dəfə ABŞ-a üz tutduğunu vurğulayaraq deyib ki, Cozef Bayden hökumətinin gethaget vaxtı ABŞ və Ermənistan arasında strateji tərəfdaşlıq barədə Xartiyanın imzalanması məğlub ölkədə sanki böyük bir uğur kimi qiymətləndirildi. ABŞ-ın keçmiş Dövlət katibi Antoni Blinkenin xartiya ilə bağlı fikirləri hayları ürəkləndirsə də, əslində, bu, Cozef Bayden hökumətinin ömrünün son günlərini yaşadığı bir vaxtda baş verdi. Xatırladaq ki, Antoni Blinken xartiya ilə bağlı bildirmişdi ki, Amerika tezliklə, ən geci bir həftəyə Ermənistana sərhəd təhlükəsizliyi ilə bağlı xüsusi qrup göndərəcək. Bu, Cozef Bayden hökumətinin xəyalları idi və Ağ evin yeni rəhbərliyi bu xəyalları hələ də gerçəkləşdirmək barədə düşünmür. ABŞ-ın yeni seçilmiş prezidenti də çox yaxşı bilir ki, Ermənistan kimi zəif bir ölkə ilə tərəfdaşlıq xartiyasının ABŞ-a heç bir faydası olmayacaq.
Siyasi şərhçinin qənaətinə görə, İrəvanın hiyləgər siyasəti və ona dəstək verən siyasi riyakarların əsas məqsədləri regionda gərginliyi artırmaqdır: “Ermənistanın müdafiə naziri Suren Papikyan bu çirkin oyunları ört-basdır etmək üçün deyib ki, guya, Cənubi Qafqaz regionunda gərginliyin artması üçün heç bir əsas yoxdur. O, yalanlarını və Qərbə sığınmaqlarını bu yolla öz sərhədlərinin təhlükəsizliyini və toxunulmazlığını təmin etməyə çalışdıqlarını deməklə ört-basdır etməyə çalışıb. Papikyan, guya, bu xartiyanın imzalanmasından sonra Ermənistan və ABŞ arasında müdafiə sahəsində əməkdaşlığın davam etdiyini və imzalanmış strateji tərəfdaşlıq sənədinə uyğun şəkildə irəlilədiyini qeyd edib. Əslində isə bu istiqamətdə hələ ki, heç bir müsbət dinamika müşahidə olunmur”.
Ə.Bədəlov Ermənistanın ABŞ-la imzaladığı strateji tərəfdaşlıq sənədinin məğlub ölkənin Qərbin himayəsinə sığınmaq niyyətindən başqa bir şey olmadığını diqqətə çatdırıb. ABŞ-da güclü erməni lobbisinin mövcudluğundan söhbət açan siyasi şərhçi deyib ki, bu da Ermənistanın həmin ölkə ilə əlaqələr qurmasına şərait yaradır. Beynəlxalq ictimaiyyət də Fransa-Ermənistan əməkdaşlığının arxasında Fransadakı güclü erməni lobbisnin dayandığının şahidi olmuşdu. Lakin bu “əməkdaşlıq”, Ermənistanın sülh yolunda irəliləməsi üçün heç bir kömək yaratmır və ölkəmizə qarşı təhdiddir. Təbii ki, Prezident, Ali Baş Komandan İlham Əliyevin rəhbərliyi ilə getdikcə mətinləşən yenilməz Azərbaycan Ordusu belə təhdidlərdən heç zaman çəkinməyib və öz torpaqlarını müdafiə etməyə qadirdir. ABŞ-Ermənistan strateji tərəfdaşlıq sənədi, siyasi riyakarların, hayların hiyləgər siyasətinin reallaşdırılmasına dəstəkdir. Bu da güclü və qüdrətli Azərbaycan Ordusu qarşısında Cənubi Qafqazda sülhə və sabitliyə heç bir təhlükə yarada bilməz.
“Azərbaycanın Ermənistanla sülh müqaviləsinin şərtlərindən biri də sərhəddən üçüncü dövlətin qüvvələrinin çıxarılmasıdır. Ancaq İrəvan əksinə, sərhədə yeni xarici qüvvələr gətirməyə can atır. Rəsmi İrəvanın həm sərhədə xarici qüvvə yığmağa davam etməsi, həm də “sülh sənədini imzalamağa hazırıq” riyakarlığı, deyəsən, hələ bir müddət davam edəcək. Ermənistanın yeganə çıxış yolu, Azərbaycanla sülh müqaviləsi imzalamaqdır. Əks halda, Ermənistanın hər hansı siyasəti yenə də işğalçılıq siyasəti kimi qiymətləndiriləcək”, - deyə Ə.Bədəlov bildirib.
Bölmənin digər xəbərləri
