İsrail çempionu olan voleybolçu: Azərbaycandan təklif olarsa, geri dönə bilərəm
Bakı, 23 aprel, AZƏRTAC
Zədə səbəbindən "Hapoel Kfar Saba" klubuna qarşı üç final matçının ikisində oynadım.
Bu sözləri AZƏRTAC-a açıqlamasında "Makkabi Aşdod" komandasının heyətində İsrail çempionu olan Azərbaycan millisinin voleybolçusu Marqarita Stepanenko deyib.
Təcrübəli hücumçu final oyununun gərgin və maraqlı keçdiyini bildirib: "Komanda yoldaşlarım əla iş gördülər. Rəqib sonadək mübarizə apardı. Çempion olduğuma görə çox xoşbəxtəm. Biz buna layiq idik. İsrail liqası ümumilikdə çox maraqlı keçir. Ölkə kubokunda ikinci olduq. Əlbəttə ki, mövsümü "qızıl dubl"la bitirmək əla olardı. Bu, idmandır, biri qalib gəldiyi zaman, digəri məğlub olur".
M.Stepanenko gələcək karyerası ilə bağlı qərar vermədiyini söyləyib: "Makkabi Aşdod"da qalıb-qalmayacağım məlum deyil. Yeni müqavilə barədə danışmamışıq. Azərbaycandan təklif olarsa, geri dönə bilərəm".
Qeyd edək ki, Marqarita Stepanenko ötən ilin yayından İsrail təmsilçisində çıxış edir.
Bölmənin digər xəbərləri
