İstanbulda Xocalı soyqırımını özündə əks etdirən “Geriyə baxma” kitabı ictimaiyyətə təqdim olunub VİDEO
İstanbul, 22 fevral, AZƏRTAC
Fevralın 22-də İstanbulda Xocalı soyqırımının 30-cu ildönümü ilə bağlı “Geriyə baxma” mövzusunda tədbir keçirilib.
AZƏRTAC xəbər verir ki, İstanbul Universitetində baş tutan tədbirdə çıxış edən bu ali təhsil ocağının tarix bölməsinin rəhbəri Fatih Sancaktar, “Türk Ocaqları”nın İstanbul üzrə rəhbəri Cezmi Bayram, Azərbaycan İlahiyyat İnstitutunun elm və innovasiyalar üzrə prorektoru Mirniyaz Mürsəlov və “Erməni təcavüzünün tanıdılması” İctimai Birliyinin sədri, yazıçı, publisist Səriyyə Müslümqızı Xocalı soyqırımının üstündən 30 il keçməsinə baxmayaraq, bu yaranın hələ də sağalmadığını, Vətən müharibəsində qazanılan Qələbə ilə Xocalı qurbanlarının qisasının alındığını vurğulayıblar.
Natiqlər dünyanın gözü qarşısında törədilən bu qətliamın səbəbkarlarının hələ də cəzalandırılmamasının insanlığa qarşı cinayət olduğunu bildiriblər.
“Xocalıya ədalət!” kampaniyasının təşkilinə və dünyada bu faciənin tanıdılması istiqamətində fəaliyyətə görə təşəkkürünü ifadə edən Səriyyə Müslümqızı deyib ki, hər bir vətəndaş Xocalı həqiqətlərinin daha geniş təbliğ edilməsi üçün çox fəal olmalıdır. O dəhşətli gecəni ürək ağrısı ilə xatırlayan Xocalı sakini deyib ki, o vaxt qətlə yetirilən 106 qadından biri də onun anası olub.
Cezmi Bayram Xocalı soyqırımının unudulmaması, gənc nəsillərə çatdırılması məqsədilə bu cür tədbirlərin Türkiyə universitetlərində mütəmadi olaraq keçiriləcəyini deyib.
Tədbirdə Azərbaycan İlahiyyat İnstitutu tərəfindən Fatih Sancaktar və Cezmi Bayrama ölkəmizin təbliği ilə bağlı hədiyyələr təqdim edilib.
Öz növbəsində Səriyyə Müslümqızı çıxış edənlərə Azərbaycan və Türkiyə bayraqlarını bağışlayıb.
Tədbir çərçivəsində Xocalı soyqırımı, erməni vandalizmi, ermənilərin azərbaycanlılara qarşı törətdikləri vəhşilikləri özündə əks etdirən “Qarabağ Azərbaycandır” sənədli filmi nümayiş olunub.
Türkiyənin “CNN Türk” kanalı tərəfindən hazırlanan filmdə, eyni zamanda, Azərbaycanın ən çətin dövründə xalqın təkidli tələbi ilə yenidən hakimiyyətə gələn ulu öndər Heydər Əliyevin xilaskar missiyası, Azərbaycan Prezidenti İlham Əliyevin xalqımızın gələcəyi naminə atdığı mühüm addımlar və Vətən müharibəsi dövründə dünya mediasına verdiyi eksklüziv müsahibələr, eləcə də Türkiyə Prezidenti Rəcəb Tayyib Ərdoğanın daim ölkəmizin yanında olması ilə bağlı fikirləri yer də alır.
Mərasim çərçivəsində Səriyyə Müslümqızının “Geriyə baxma” adlı kitabının təqdimatı da keçirilib.
Azərbaycan Respublikası Dini Qurumlarla İş üzrə Dövlət Komitəsi Azərbaycan İlahiyyat İnstitutu və “Erməni təcavüzünün tanıdılması” İctimai Birliyi tərəfindən ərsəyə gələn kitab 1992-ci il fevralın 25-dən 26-na keçən gecə erməni vandalları tərəfindən törədilən Xocalı soyqırımından bəhs edir. Soyqırımı zamanı 613 azərbaycanlı vəhşicəsinə qətlə yetirilib ki, onlardan 70 nəfəri ahıldır. Bu insanların faciəvi həyatı kitabda öz əksini tapıb.
Tədbirdə universitetin tələbə-müəllim heyəti və Türkiyə ictimaiyyətinin nümayəndələri iştirak ediblər.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
