İQTİSADİYYAT
KANADADA AZƏRBAYCANA DİQQƏT VƏ MARAQ DAHA DA ARTIR
Azərbaycan Respublikasının ABŞ və Kanadadakı səfiri Hafiz Paşayev Ottavada dövlət qurumlarının və qeyri-hökumət sektorunun nümayəndələri ilə görüşlər keçirmiş iki ölkə arasında əlaqələrin inkişafı və möhkəmləndirilməsinə dair müzakirələr aparmışdır.
Hafiz Paşayev AZƏRTAC-ın müxbiri ilə səfər barədə söhbətində bildirdi ki, keçirdiyi bütün görüşlərdə Kanadanın Mərkəzi və Şərqi Avropa, Yaxın Şərq problemləri üzrə dövlət katibi Qar Nutsonun Bakıya səfərinin təsiri hiss edilirdi, yəni Azərbaycana diqqət və maraq daha da artıbdır. Əməkdaşlığa dair müzakirələrdə müsbət münasibət və nikbinlik görünürdü.
Diplomatın sözlərinə görə, Kanadanın iş adamları Azərbaycanda sərmayə qoyuluşunu artırmaq niyyətindədirlər. Onların xüsusi maraq göstərdiyi sahələr Bakı-Tbilisi-Ceyhan kəmərinin tikilməsi və bu layihə ətrafında yaranacaq xidmətlər kompleksi, kənd təsərrüfatı məhsullarının emalı və təbii sərvətlərin işlənilməsidir. Kanada böyük səkkizliyin qüdrətli üzvüdür. Onun texniki, maliyyə və təhsil cəhətdən imkanları, hətta ABŞ-la müqayisə oluna bilər. İnkişaf edən dövlətlərə yardım Kanadanın xarici siyasətinin bir hissəsidir. Bu baxımdan Azərbaycan Kanada ilə əlaqələrdən xeyli bəhrələnə bilər. Kanada tərəfi Azərbaycana heyətlərin səfərlərini ənənə şəklinə salmaq niyyətindədir. Bir sözlə, Ottava ölkəmizi bölgədə prioritet tərəfdaş kimi qiymətləndirir.
Müzakirələrin əsas mövzusundan biri də Ermənistan-Azərbaycan münaqişəsinin həlli yolları idi. Azərbaycan diplomatı Kanada rəsmilərinə sülh prosesinə dair davam edən danışıqlardakı vəziyyət barədə ətraflı məlumat vermişdir. Hafiz Paşayev hesab edir ki, hazırda işimizin böyük hissəsi Kanadada Azərbaycan haqqında həqiqətləri yaymaqdan ibarətdir. Bu baxımdan yaradılacaq parlamentlərarası işçi qrupu böyük kömək ola bilər. Hafiz Paşayev bildirdi ki, Kanada parlamentinin üzvləri ilə görüşlərdə ölkənin qanunverici orqanında Xəzər hövzəsinə dair - bölgənin bugünkü əhəmiyyəti və işgüzar adamlara açdığı imkanlar barədə dinləmələrin təşkilinin zəruriliyi müzakirə edilmişdir. Səfir onu da qeyd etdi ki, ikitərəfli əlaqələrin inkişafını daha da sürətləndirmək üçün Ottavada müşavir səviyyəsində Vaşinqton səfirliyini təmsil edəcək daimi nümayəndənin olması məsələsi gündəlikdədir.
Diplomat xarici səfirlərin şərəfinə verilən ziyafətlərdə iştirak edərkən Kanadanın general-qubernatoru xanım Adrienn Klarksonla və baş nazir Jan Kretyenlə qısa söhbət etmiş, onlara Azərbaycan Prezidenti Heydər Əliyevin salamını çatdırmışdır.
Şəfəq Akifqızı
AZƏRTAC-ın xüsusi müxbiri
Vaşinqton