Kaya Kallas: “Dron divarı” layihəsi bütün Avropanı əhatə edəcək
Bakı, 12 noyabr, AZƏRTAC
Əvvəlcə yalnız Avropa İttifaqının şərqindəki ölkələrdə həyata keçirilməsi nəzərdə tutulan “Dron divarı” layihəsi indi bütün Avropanı əhatə edəcək şəkildə genişləndirilib.
AZƏRTAC xəbər verir ki, Avropa diplomatiyasının rəhbəri Kaya Kallas bu barədə Yunanıstanın “Kathimerini” qəzetinə müsahibəsində deyib. “İlkin olaraq yalnız şərq cinahı üçün nəzərdə tutulan pilotsuz təyyarələrə qarşı divar indi bütün Avropaya şamil ediləcək. Dronlar hər bir region üçün təhlükədir, kommersiya uçuşlarına mane olur və Avropa hava limanlarında problemlər yaradır”, - deyə Kaya Kallas bildirib.
Qeyd edək ki, “Dron divarı” layihəsi Almaniya, Polşa, Finlandiya və Baltikyanı ölkələr arasında Rusiya ilə sərhəddə pilotsuz uçuş aparatlarına qarşı çoxqatlı monitorinq və avtomatlaşdırılmış müdafiə sistemlərinin yerləşdirilməsinə yönəlmiş birgə təşəbbüsdür. Layihə hazırda inkişaf və prototip seçimi mərhələsindədir.
Bölmənin digər xəbərləri
