SİYASƏT
Kiyevdə Ukrayna Azərbaycanlılar Diasporunun II Forumu keçirilmişdir
Kiyev, 7 oktyabr (AZƏRTAC). Oktyabrın 6-da Kiyevdəki “Prezident” mehmanxanasının “Yevropeyski” konfrans salonu Azərbaycan və Ukraynanın dövlət bayraqları ilə bəzədilmişdi. Burada Ukrayna Azərbaycanlılar Diasporunun II Forumu keçirilirdi.
Ölkəmizin Kiyevdəki diplomatik nümayəndəliyinin dəstəyi ilə “Ukrayna Azərbaycanlılarının Birləşmiş Diasporu” (UABD) Ümumukrayna ictimai təşkilatı tərəfindən keçirilən tədbir “Ukraynada Azərbaycan Diasporunun inkişaf perspektivləri” mövzusuna həsr edilmişdi.
İki dost ölkənin dövlət himnləri səslənmiş, sonra UABD-nin sədri Hikmət Cavadov tədbiri açaraq giriş sözü söyləmişdir. H.Cavadov rəhbərlik etdiyi təşkilatın 2012-ci ilin iyun ayında Ukrayna Azərbaycanlıları diasporunun I Forumundan sonrakı müddətdə keçirdiyi çoxsaylı tədbirlər haqqında söhbət açmış, rəhbərlik etdiyi qurumun taktiki və strateji planları, o cümlədən Azərbaycan Respublikasının Diasporla İş üzrə Dövlət Komitəsi ilə birlikdə dünyanın müxtəlif ölkələrində yaşayan həmvətənlərimizlə telekörpülər təşkil edilməsi barədə məlumat vermişdir. UABD rəhbəri Ukrayna Azərbaycanlılarının bundan sonra da həmrəy olması, bir neçə təşkilatın vahid sağlam ictimai qüvvə şəklində birləşməsi məsələsinə daimi dəstək və hərtərəfli köməyə görə Azərbaycanın Kyevdəki səfirinə səmimi təşəkkürünü bildirmişdir.
Sonra ölkəmizin Ukraynadakı diplomatik nümayəndəliyinin rəhbəri Eynulla Mədətli geniş nitq söyləmişdir. E.Mədətli UABD-nin və onun sədrinin fəaliyyətindən çox razı olduğunu bildirərək H.Cavadova işində yeni uğurlar arzulamışdır. Səfir həmvətənlərimizin təşkilatları arasında nəzərə çarpan fəallığı və sağlam rəqabəti, onların birləşməyə yönəlmiş müxtəlif tədbirlər keçirmələrini vurğulamışdır. E.Mədətli diasporun indiyə qədər keçirdiyi forumları xatırladaraq, Dünya Azərbaycanlıları Konqresi (DAK) tərəfindən Donetskdə (təşkilatçı - DAK-ın Ukraynadakı nümayəndəsi Möhlət Hüseynov) və Sumı vilayətində (təşkilatçı - vilayət sovetinin deputatı, sahibkar Əfqan Salmanov), “Azərbaycançılıq İnstitutu” (prezident - Oleq Krapivin) tərəfindən Kiyevdə keçirilmiş forumları, habelə oktyabrın 5-də Ukrayna paytaxtındakı “Kiyevskaya Rus” mehmanxanasında formalaşma mərhələsində olan Ukrayna Azərbaycanlılarının Birləşmiş Konqresini (Konqresin müvəqqəti rəhbəri Rövşən Tağıyevdir) nümunə göstərmişdir.
Sonra diplomat Azərbaycanın daxili və xarici siyasətdə möhtəşəm uğurları, cari ilin oktyabr ayının birindən etibarən ölkəmizin BMT Təhlükəsizlik Şurasında sədrliyə başlaması, Ermənistan-Azərbaycan, Dağlıq Qarabağ münaqişəsində vəziyyət məsələləri üzərində ətraflı dayanmışdır.
Səfir çıxışının sonunda xalqımızın öz iradəsini demokratik, azad və şəffaf ifadə etməsi üçün Azərbaycanın diplomatik nümayəndəliyində hər cür şərait yaradıldığını vurğulamış və Ukraynada yaşayan, seçici kimi qeydiyyata alınmış bütün Azərbaycan vətəndaşlarını oktyabrın 9-da Azərbaycan Respublikasının Kiyevdəki səfirliyində yaradılmış seçki məntəqəsinə gəlməyə çağırmışdır.
Ölkəmizin Ukraynadakı keçmiş səfiri Tələt Əliyev, Ukrayna Azərbaycanlıları Konqresinin keçmiş sədri İlqar Abbasov, Nikolayev vilayətindəki Azərbaycan Diasporunun liderlərindən biri olan Ələddin Məhərrəmov və başqaları Ukraynadakı həmvətənlərimizin daha sıx birləşməsi, tarixi vətənlə əlaqələrin möhkəmləndirməsi mövzusunu davam etdirərək hamını öz vətəndaş borcunu yerinə yetirməyə - Azərbaycan prezidenti seçkilərində səsvermədə fəal iştirak etməyə çağırmışdır.
Məşhur ukraynalı siyasətçi, UABD-nin tərkib hissəsi olan Ukrayna Türk Xalqları Konqresinin rəhbəri Yuri Zbitnev etnik Azərbaycanlıların ictimai fəallığını yüksək qiymətləndirərək əmin olduğunu bildirmişdir ki, bu insanlar yaşadıqları ölkənin böyük siyasətində, Ukrayna hakimiyyət orqanlarının bütün şaxələrində sanballı mövqelər tutacaqlar. Yeri gəlmişkən, Çerniqov vilayəti apellyasiya məhkəməsinin sədri Sadiq Tağıyev və Ukraynanın keçmiş energetika və kömür sənayesi nazirinin müavini Burzu Əliyev forumun rəyasət heyətində əyləşmişdi.
Sonra hüquq elmləri doktoru, Ukrayna Milli Aviasiya Universitetinin Beynəlxalq Münasibətlər İnstitutunun beynəlxalq hüquq kafedrasının professoru, “Xalq diplomatiyası institutu” ictimai təşkilatının idarə heyətinin sədri, Ukraynanın əməkdar təhsil işçisi Arif Quliyev bizim diasporda Ağsaqqallar Şurası və Alimlər Şurası kimi ictimai təşkilatlar yaradılmasını, sahibkar Murad Cəfərov, ukraynalı məşhur hüquq müdafiəçisi Eduard Bağırov, Kiyevdəki bir sıra ali məktəblərin müəllimi, dosent Fərhad Turanlı öz profillərinə uyğun strukturlar yaradılmasını təklif etdilər.
Müslüm Maqomayev adına Azərbaycan Mədəniyyət Mərkəzinin sədri, UKraynanın xalq artisti Qurban Abbasov Ukrayna Azərbaycanlılar Diasporunun I Forumundan sonra keçirilmiş çoxsaylı mədəni tədbirlər haqqında söhbət açmışdır.
Xarkov vilayətində həmvətənlərimizin liderlərindən Fəxrəddin İsmayılov, Diasporda qadın hərəkatının fəal üzvü Mətanət Rzayeva, Dnepropetrovsk vilayəti azərbaycanlıları liqasının nümayəndəsi Eldar Tağıyev, Odessa vilayətindəki Gənclər Təşkilatının fəal üzvü Elsevər Paşayev və başqaları Ukraynada Azərbaycan Diasporunun inkişaf perspektivləri barədə fikirlərinin bölüşmüşlər.
Natiqlərin çıxışlarından sonra Azərbaycan diasporunun tanınmış nümayəndələrinə UABD-nin fəxri mükafatları təqdim edilmişdir.
Azərbaycanın səfiri və H.Cavadov forumun nəticələri barədə Azərbaycan və Ukrayna mətbu və elektron KİV-lərinin nümayəndələrinə müsahibə vermişlər.
Zeynal Ağazadə
AZƏRTAC-ın xüsusi müxbiri
Kiyev