Konfransda yeni texnologiyalar və enerji imkanları ilə bağlı müzakirələr keçirilmişdir
Bakı, 3 noyabr (AZƏRTAC). “Bakı Ekspo” Mərkəzində keçirilən “Xəzər: ətraf mühit üçün texnologiyalar” (“CTE-2011”) sərgisi çərçivəsində Ekologiya və Təbii Sərvətlər Nazirliyinin dəstəyi ilə noyabrın 3-də “Ətraf mühit texnologiyaları və yaşıl iqtisadiyyat imkanları” mövzusunda konfrans keçirilmişdir.
AZƏRTAC xəbər verir ki, ölkəmizin aidiyyatı dövlət və qeyri-hökumət təşkilatları, tədris və elm müəssisələri nümayəndələrinin, xarici qonaqların iştirak etdikləri konfransın açılış mərasimində çıxış edən ekologiya və təbii sərvətlər nazirinin müavini Novruz Quliyev ölkəmizdə ətraf mühitin qorunmasına dair görülən işlər barədə məlumat vermişdir.
Ekologiya sahəsində qəbul edilmiş dövlət proqramlarını xatırladan N.Quliyev artıq Azərbaycanda mükəmməl ekoloji siyasətin formalaşdığını demişdir. Bildirmişdir ki, məhz geniş hüquqi bazanın mövcudluğu sayəsində ekologiyanın bütün sahələri üzrə geniş tədbirlər həyata keçirilmiş və böyük nailiyyətlər əldə olunmuşdur.
Ekoloji siyasətin formalaşması istiqamətində mühüm addımlar atıldığını söyləyən təhsil nazirinin müavini Qulu Novruzov ali və orta məktəblərdə ətraf mühitin qorunması ilə bağlı aparılan maarifləndirmə işlərindən danışmışdır.
Bu qəbildən olan tədbirlərin vacibliyini qeyd edən Q.Novruzov Ekologiya və Təbii Sərvətlər Nazirliyi ilə birgə tədbirlərin davam etdiriləcəyini söyləmişdir.
Sənaye və Energetika Nazirliyinin Alternativ və Bərpa Olunan Enerji Mənbələri üzrə Dövlət Agentliyinin direktoru Akim Bədəlov çıxışında rəhbərlik etdiyi qurumun fəaliyyətindən söz açmışdır. Bildirmişdir ki, Qobustan Eksperimental Poliqonunun ərazisində alternativ enerjiyə nəzarət və təlim-tədris mərkəzləri fəaliyyət göstərir. Poliqonda Azərbaycan və xarici ölkələrdən gələn tələbələr üçün alternativ və bərpa olunan enerji mənbələri haqqında məşğələlərin keçirilməsi nəzərdə tutulmuşdur. Bundan başqa, Sumqayıtda yüksək texnologiyalar parkı salınacaqdır.
Çıxış edənlər, həmçinin konfransın əhəmiyyətini vurğulamış, işinə uğurlar arzulamışlar.
Konfransda “Ətraf mühit texnologiyaları, sutəmizləyici sistemlər”, “Yaşıl iqtisadiyyat imkanları”, “Alternativ və bərpa olunan enerji imkanları” mövzularında 30-dan çox məruzə dinlənilmişdir.
Sonra məruzələrlə bağlı müzakirələr aparılmışdır.
Bölmənin digər xəbərləri
