Yaponiya Beynəlxalq Əməkdaşlıq Bankı ekspertlərinin nümayəndə heyəti Bakıda beşgünlük səfərdədir. Qonaqlar iqtisadi inkişaf, yanacaq və energetika nazirliklərində, ARDNŞ-də, habelə “Azərenerji” və “Azəriqaz” səhmdar cəmiyyətlərində görüşlər keçirəcəklər. 

“Azərenerji”dən bildirmişlər ki,Yaponiya maliyyəçilərinin səfərindən əsas məqsəd “Şimal” DRES-də 400 mVt gücündə ikinci buxar-qaz qurğusunun tikintisi layihəsi üçün kredit ayrılması imkanlarını öyrənməkdir.

Bank nümayəndələrinin milli energetika sahəsinin rəhbərləiyi ilə apardıqları danışıqlarda tərəflər “Şimal” DRES-də birinci buxar-qaz qurğusunun tikintisi layihəsinin gerçəkləşdirilməsinin sürətini yüksək qiymətləndirmişlər. İndi stansiyada sınaq işləri görülür və onun ilin sonunadək tam gücü ilə işə salınacağı gözlənilir.

“Azərenerji” SC-nin mütəxəssisləri Yaponiya Beynəlxalq Əməkdaşlıq Bankı ilə əməkdaşlığı qarşılıqlı surətdə faydalı və uğurlu hesab edirlər. Bu bank ölkəmizə ildə 0,75 faizlə 40 il müddətinə güzəştli kreditlər ayırmışdır.

Danışıqlar uğurla qurtararsa, bu layihənin həyata keçirilməsinə 2003-cü ilin payızında başlamaq mümkündür.