Kreml nüvə proqramı üzrə ABŞ-İran təmaslarını alqışlayır
Moskva, 9 aprel, AZƏRTAC
Rusiya ABŞ və İran arasında Omanda planlaşdırılan təmasları İranın nüvə dosyesi ətrafında gərginliyin azaldılması istiqamətində müsbət addım hesab edir.
AZƏRTAC xəbər verir ki, bu barədə Rusiya Prezidentinin mətbuat katibi Dmitri Peskov Omanda keçiriləcək danışıqlar raundu ilə bağlı məlumatları şərh edərkən deyib. Onun sözlərinə görə, Moskva danışıqlar prosesinin başlanmasını qeyd-şərtsiz dəstəkləyir və siyasi-diplomatik tənzimlənmə tərəfdarıdır.
“Biz dəfələrlə demişik ki, İranın nüvə dosyesi probleminin siyasi-diplomatik tədbirlər vasitəsilə tənzimlənməsinin tərəfdarıyıq. Əgər bu belə olarsa, bunu, yalnız müsbət qarşılamaq olar”, - deyə Kreml nümayəndəsi qeyd edib.
O əlavə edib ki, Rusiya Omanda planlaşdırılan birbaşa və dolayı təmaslardan xəbərdardır və onların İran ətrafında vəziyyətin deeskalasiyasına gətirib çıxaracağına ümid etdiyini bildirib.
Bundan əvvəl, martın 7-də ABŞ Prezidenti Donald Tramp İran İslam Respublikasının Ali rəhbəri Ayətullah Seyid Əli Xameneiyə nüvə proqramı üzrə danışıqlar təklifi ilə mesaj göndərdiyini açıqlamışdı. Medianın məlumatına görə, ABŞ və İran nümayəndə heyətləri arasında təmasların birinci mərhələsi aprelin 12-də Omanda baş tutacaq.
Bölmənin digər xəbərləri
