Krımda keçirilən dil festivalında Azərbaycan dilinin təqdimatı olmuşdur
Bakı, 12 noyabr (AZƏRTAC). Yaltada Krım Humanitar Universiteti tərəfindən təşkil olunmuş dil festivalı keçirilmişdir. Artıq ikinci dəfə keçirilən festivalda Azərbaycan dili təqdim edilmişdir.
Təqdimat mərasimi görkəmli müğənni Müslüm Maqomayevin ifasında “Azərbaycan” mahnısının sədaları altında başlanmışdır. Krımın azərbaycanlılar icmasının rəhbəri Rəhim Hümbətov Azərbaycan ədəbi dilinin formalaşması haqqında mühazirə ilə çıxış etmişdir. Tədbir iştirakçıları mühazirəni böyük maraqla qarşılamışlar.
Qeyd edilmişdir ki, Azərbaycan dili təkcə Azərbaycanda deyil, Rusiya, Gürcüstan, İran, İraq və Türkiyədə, habelə planetimizin ölkələrinin çoxunda Azərbaycan diasporunun yaşadığını nəzərə alsaq, demək olar ki, bütün dünyada yayılmışdır. Bu dil Azərbaycanın dövlət dili və Dağıstanın dövlət dillərindən biridir. Bəzi tədqiqatçıların fikrincə, hazırda dünyada Azərbaycan dilində danışan insanların sayı 50 milyona yaxındır.
Azərbaycan dilinin tarixən formalaşması faktları üzərində ətraflı dayanmış mühazirəçi Səfəvilər dövlətində Azərbaycan dilinin yüksək statusa malik olmasını vurğulamışdır.
Təşkilatçılar bu festivala ənənəvi tədbir xarakteri verilməsini planlaşdırırlar.
Bölmənin digər xəbərləri
