KÜR BOYU ƏRAZİLƏRDƏ XİLASETMƏ TƏDBİRLƏRİ DAVAM ETDİRİLİR
Sabirabad, 17 may (AZƏRTAC). “Meliorasiya və Su Təsərrüfatı” Açıq Səhmdar Cəmiyyətinin sədri Əhməd Əhmədzadə mayın 17-də jurnalistlərə demişdir ki, dövlət başçısının tapşırığına əsasən Kür boyu ərazilərdə xilasetmə tədbirləri davam etdirilir.
Kürdə suyun daha 100 kubmetr artması gözlənilir. Buna səbəb dağlarda qarın əriməsi, yağış sularının normadan artıq olmasıdır.
Saatlı rayonundakı Sarısu gölü ətrafında yaranmış vəziyyət də normallaşır. Burada bəndin aşdığı iki yerdə suyu bağlamaq mümkün olmuşdur. Daha bir yerdə bəndvurma tədbirləri davam etdirilir.
Sarısu gölü Kür çayı üçün nizamlayıcı rolunu oynayır. Kürün səviyyəsi qalxdıqda suyun bir hissəsi bu gölə axıdılırdı. İndi göldə suyun səviyyəsi çoxdur, bu da ətraf ərazilər üçün təhlükə yaradır. Amma təhlükə yoxdur. Fövqəladə Hallar, Müdafiə, Daxili İşlər nazirliklərinin, “Meliorasiya və Su Təsərrüfatı” Açıq Səhmdar Cəmiyyətinin qüvvələri hadisə yerindədir və xilasetmə tədbirləri davam etdirilir.
Bölmənin digər xəbərləri
