Kür çayının aşağı axınında son günlər suyun səviyyəsi düşmüşdür
Bakı, 9 iyul (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamenti tərəfindən çayların mövcud vəziyyəti araşdırılmışdır.
Nazirliyin mətbuat xidmətindən AZƏRTAC-a bildirmişlər ki, araşdırmaya görə, hazırda Böyük Qafqazın Quba-Xaçmaz bölgəsi çaylarında sululuq ongünlük normanın 65-85, Kiçik Qafqaz çaylarında 75-145, Lənkəran-Astara bölgəsi çaylarında 200-230, Naxçıvan MR çaylarında isə 70-150 faizini təşkil etmişdir.
Müəyyən edilmişdir ki, iyulun 6-dan başlayaraq Kür çayının Qıraqkəsəmən məntəqəsində suyun səviyyəsi 30 santimetr azalmışdır. Hazırda məntəqədə su sərfi saniyədə 120 kubmetrdir. Qanıx çayının Əyriçay məntəqəsində isə suyun səviyyəsində iyulun 9-da 5 santimetr artım qeydə alınmışdır.
Son üç gün ərzində Kür çayının aşağı axınındakı Surra məntəqəsində suyun səviyyəsinin 35, Şirvanda 46, Salyanda 45, Bankədə 21, Araz çayının Novruzlu məntəqəsində isə 20 santimetr azalması müşahidə olunmuşdur.
Bölmənin digər xəbərləri
