KÜR ÇAYININ AŞAĞI AXININDA SUYUN SƏVİYYƏSİNİN ARTIMI DAVAM EDƏCƏKDİR
Bakı, 17 may (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamentinin verdiyi məlumata görə, mayın 15-də axşam saatlarında və mayın 16-na keçən gecə yağan intensiv leysan yağışı nəticəsində əksər çaylarda, o cümlədən Kür, Araz və Qanıx çaylarının yuxarı axınında sululuğun artımı qeydə alınmışdır.
Hazırda ən yüksək sululuq Böyük Qafqazın Quba-Xaçmaz bölgəsi çaylarında müşahidə olunur və ongünlük normanın 120-344, Balakən-Şəki bölgəsi çaylarında 90-210, Kiçik Qafqaz çaylarında 132-203 faizini təşkil edir. Lənkəran-Astara bölgəsi çaylarında isə sululuq normadan aşağıdır (ongünlük normanın 120-145 faizi) .
Kür çayının Qıraqkəsəmən məntəqəsindən Şəmkir su anbarına axım 760 (ongünlük normanın 106 faizi), Qanıx çayından Mingəçevir su anbarına axım isə 223 kubmetr/saniyə (ongünlük normanın 110 faizi) təşkil edir.
Mayın 15-də axşam saatlarında və mayın 16-na keçən gecə yağan intensiv leysan yağışı nəticəsində Kür, Araz, Qanıx çaylarında və onlara tökülən qollarda sululuğun artması nəticəsində mayın 17-də Kür çayının Zərdab məntəqəsində suyun səviyyəsi 10, Surrada 11, Şirvan və Salyanda 15, Bankədə 6, Araz çayının Novruzlu məntəqəsində isə 8 santimetr artmışdır.
Mayın 15-də axşam və mayın 16-na keçən gecə yağan intensiv leysan yağışı nəticəsində respublikanın ərazisində, o cümlədən qonşu ölkələrdə Kür, Araz, Qanıx çaylarının hövzələrində sululuğun artımı qeydə alınmışdır ki, bununla əlaqədar yaxın günlərdə Kür çayının aşağı axınında səviyyənin artımının davam edəcəyi gözlənilir.
Bölmənin digər xəbərləri
