Kür və Araz çaylarında biogen maddələrin miqdarı normadan artıqdır
Bakı, 13 iyul (AZƏRTAC). Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti tərəfindən Kür və Araz çaylarında iyul ayının birinci ongünlüyü üçün növbəti monitorinq keçirilmişdir.
Nazirliyin mətbuat xidmətindən AZƏRTAC-a bildirmişlər ki, monitorinqin nəticələrinə görə, Kür çayında su sərfi iyun ayının üçüncü ongünlüyünə nisbətən saniyədə 5 kubmetr artaraq saniyədə 130 kubmetr təşkil etmişdir.
Bundan başqa, Gürcüstan və Ermənistan ərazilərindən təmizlənmədən axıdılan məişət tullantıları və sənaye müəssisələrinin çirkab sularının təsiri nəticəsində Kür çayında biogen maddələrin miqdarının normadan dəfələrlə artıq olduğu müəyyən edilmişdir. Məlum olmuşdur ki, suyun tərkibindəki spesifik çirkləndiricilərdən fenol və mis birləşmələri Ağstafaçay su anbarında da yol verilən qatılıq həddini keçmişdir.
Eyni hal Araz çayının Horadiz, Birinci Şahsevən və Bəhrəmtəpə məntəqələrində də müşahidə edilmişdir.
Suyun oksigen rejimi isə bütün məntəqələrdə sanitar norma daxilində dəyişmişdir.
Bölmənin digər xəbərləri
