DÜNYA
Macarıstan Rumıniyanın Şengen zonasına daxil olmasını fəal şəkildə dəstəkləyir
Budapeşt, 10 aprel, AZƏRTAC
Macarıstan hökuməti Rumıniya ilə iqtisadi əlaqələrinin möhkəmləndirilməsi üçün fəal səy göstərir və onun Şengen zonasına daxil olmasını dəstəkləyir.
AZƏRTAC xəbər verir ki, bu barədə Budapeştdə Rumıniyanın inkişaf və ictimai işlər naziri Attila Çeke ilə danışıqların başa çatdırılmasından dərhal sonra ölkənin inşaat və nəqliyyat naziri Yanoş Lazar bildirib.
Y.Lazar deyib ki, iki ölkə arasında nəqliyyat infrastrukturunun inkişafı və sərhədlərin şəffaflığının təmin edilməsi Şengen proqramının əsas məqsədləridir. O, rumıniyalı həmkarını Macarıstanın Rumıniyanın Şengen zonasına qoşulmaq istəyini dəstəkləməyə hazır olduğundan əmin edib.
Macarıstan hökumətinə təşəkkür edən Attila Çeke ötən il iki ölkə arasında ticarət dövriyyəsi 15 milyard avro təşkil edən iqtisadi əlaqələri yüksək qiymətləndirib.
Vüqar Seyidov
AZƏRTAC-ın xüsusi müxbiri
Budapeşt