Mahir Emreli: Heç bir rəqibdən çəkinmirik – MÜSAHİBƏ
Bakı, 23 avqust, AZƏRTAC
Azərbaycan millisinin və Xorvatiyanın “Dinamo” komandasının futbolçusu Mahir Emreli Zaqreb təmsilçisindəki vəziyyəti, son vaxtlar ehtiyatda qalması və gələcək planları barədə AZƏRTAC-a müsahibə verib.
- “Dinamo” komandasında işləriniz necə gedir? Hazırkı vəziyyətinizdən razısınızmı?
- Hər şey qaydasındadır. İşlərimiz yaxşı gedir. Çempionlar Liqasında AEK-ə məğlubiyyəti saymasaq, hazırkı durum bizi qane edir. Xorvatiya çempionatına yaxşı başlaya bilmədik. Amma futbolda belə anlar da olur. Düşünürəm ki, vəziyyəti düzəltmək üçün həm zamanımız, həm də keyfiyyətimiz var.
- Bəzi matçlarda ehtiyatda qalırsınız. Ümumiyyətlə, oyun praktikası sizi qane edir?
- AEK-ə qarşı ilk matçda 45 dəqiqə oynamışam. Son dörd görüşün ikisində isə meydana əsas heyətdə çıxmışam. Fikrimcə, bu qarşılaşmalarda yaxşı oynamışam. Həm statistik, həm də oyun planı baxımından heç bir problem yaşamamışam.
- Daha çox oynamaq şansı qazanmaq üçün başqa komandaya keçmək fikriniz varmı?
- Variantlar hər zaman olub. Sadəcə, həmişə doğru addım atmağı düşünmüşəm. Həm mental, həm də futbol baxımından üzərimdə çox çalışmalı, daim hazır olmalıyam. Hazırda “Dinamo”nun futbolçusuyam, klubla 2026-cı ilədək müqaviləm var. Burada olduğum müddətdə yalnız öz komandamı düşünürəm. Təkliflər, digər məsələlər mənim yox, menecerlərimin və ailəmin məşğul olduğu işlərdir.
- Komandanız Çempionlar Liqasının III təsnifat mərhələsində iki oyunun nəticəsinə əsasən, Yunanıstan AEK-inə uduzaraq mübarizəni erkən dayandırdı. Sizcə, mərhələni keçməyinizə nə mane oldu?
- Bu oyun haqqında çox danışmaq istəmirəm. Ani diqqətsizliklər vəziyyətin bu yerə gəlib çıxmasına şərait yaratdı.
- Avropa Liqasının pley-off mərhələsində rəqibiniz Çexiyanın “Sparta” (Praqa) komandası olacaq. Bu oyunlardan nə gözləyirsiniz?
- Rəqibi diqqətlə analiz edib, oyunlara hazırlaşmalıyıq. “Sparta” çox yaxşı komandadır. Təlim-məşq toplanışında onlara qarşı oynamışıq. Bizi ağır qarşılaşma gözləyir. Rəqib xarakterli, fiziki cəhətdən güclü və keyfiyyətli futbolçulardan ibarət kollektivdir. Asan olmayacaq. Qrup mərhələsinə vəsiqə qazanmaq üçün əlimizdən gələni edəcəyik.
- İki gün öncə “Dinamo”da baş məşqçi dəyişikliyi oldu. Klub rəhbərliyi İqor Bişçanı Sergey Yakiroviçlə əvəzlədi. Bu dəyişiklik barədə fikirlərinizi bilmək maraqlı olardı...
- Bu barədə bir söz deyə bilmərəm. Çünki yeni baş məşqçini tanımıram. Hər şeyi zaman göstərəcək. Sadəcə, əvvəlki statistik məlumatları ilə tanışıq. Gördüyü yaxşı işləri bilirik. Ümid edirəm ki, burada da işi uğurlu alınar. Biz futbolçuyuq, öz işimizi görməliyik.
- Qarşıda Azərbaycan millisini iki oyun gözləyir. Yığma sentyabrın 9-da Belçika ilə AVRO-2024-ün seçmə mərhələ oyununa, bundan üç gün sonra isə İordaniya ilə yoldaşlıq matçına çıxacaq. Xüsusilə, Belçikaya qarşı oyun barədə nə deyə bilərsiniz?
- Belçika yığmasının adı çox şeydən xəbər verir. Bu matçda daha məsuliyyətli oynamalıyıq. Çünki rəsmi oyundur. Yaxşı nəticə əldə etməyə çalışmalıyıq. Nə olursa-olsun, heç bir rəqibdən çəkinmirik. Evdə oynayacağıq, əlimizdən gələnin ən yaxşısını etməliyik. Bunun üçün isə mental olaraq hazır olmaq lazımdır.
- Rəqibin adı, futbolçularının keyfiyyəti hansısa narahatlıq yaradırmı?
- Əlbəttə ki, yox. Heç bir yığmadan çəkinmək lazım deyil. Oynadığımız komandanın kimliyi çox da önəm daşımır. Bəlkə də “Dinamo”da oynadığımdan bu məsələ mənim üçün daha vacibdir. Çünki komandamızda Xorvatiya, Şimali Makedoniya və digər yığmalardan oyunçular var. Xorvatiya seçməsinin nəticələri göz önündədir. Şimali Makedoniya İtaliya kimi komandanı məğlub edib. Heç kim düşünməsin ki, Mahir milli komandada əlindən gələni etmir. Əksinə, daha çox yığmada bütün gücümü ortaya qoymağa çalışıram. Çünki “Dinamo”ya qayıtdıqdan sonra burada həmin oyunların, kimin necə oynamasının söhbətləri gedir. Daim izləyirlər. Öz ölkənin millisində yaxşı nəticə qazanmalısan ki, bir-iki kəlmə də sən danışa biləsən. Bu baxımdan yığmadakı nəticə mənim üçün çox önəmlidir. Heç bir oyuna qorxa-qorxa, məğlub olmaq üçün çıxmırsan. İstənilən rəqibi məğlub etmək mümkündür. Belçika həmin vaxt öz günündə olmaya bilər, və ya biz daha ideal oyun göstərə bilərik. Nəticədən asılı olmayaraq, meydanda əlindən gələni etməli və gözəl oyun sərgiləməlisən. Qoy, azarkeşlər də desinlər ki, Belçika kimi komandaya qarşı layiqli mübarizə apardılar.
- Bəs, İordaniya ilə yoldaşlıq matçı barədə nə düşünürsünüz?
- Bu komanda barədə geniş məlumatım yoxdur. Ona görə necə komanda olduğunu deyə bilmərəm. Yəqin ki, millinin düşərgəsində olduğumuz müddətdə bu komandanı da analiz edəcəyik.
Bölmənin digər xəbərləri
