“MBA-Moskva” Sankt-Peterburq və Yekaterinburq filiallarını bağlayır
Moskva, 6 mart, AZƏRTAC
Azərbaycan Beynəlxalq Bankı (MBA) qrupunun özəlləşdirilməsi strategiyası çərçivəsində MBA-nın Sankt-Peterburqdakı və Yekaterinburqdakı filiallarının fəaliyyətinin dayandırılması barədə qərar qəbul edilib.
“MBA-Moskva” Bankının mətbuat xidmətindən AZƏRTAC-a bildiriblər ki, Sankt-Peterburq və Yekaterinburq filiallarının bağlanması barədə qərar bankın öz biznesini Moskva regionunda cəmləşdirmək və inkişaf etdirmək niyyəti ilə bağlıdır.
“Bank “MBA-MOSKVA” MMC Sankt-Peterburq və Yekaterinburq filiallarının müştəriləri qarşısındakı öhdəliklərini tam həcmdə və vaxtında yerinə yetirir və bundan sonra da buna əməl edəcəkdir. Bağlanmaq üzrə olan filiallarda müştərilərə xidmət ştat rejimində həyata keçirilir. Artıq martın 5-dən həmin filiallarda əmanət qəbul olunmur və ödəmə sistemləri ilə pul köçürülmür. Əmanətlərin geri qaytarılması və pul baratı məhdudiyyət qoyulmadan adi qaydada həyata keçirilir.
Filialların bu il aprelin 27-də bağlanması nəzərdə tutulub.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
