MDB DÖVLƏTLƏRİNİN TAEKVONDO ÜZRƏ BİRİNCİ AÇIQ ÇEMPİONATI
Yanvarın 25-də Bakı İdman Sarayında ilk dəfə olaraq Müstəqil Dövlətlər Birliyinin taekvondo üzrə birinci açıq çempionatının təntənəli açılışı olmuşdur.
Yarışda Azərbaycan, Rusiya, Gürcüstan, Qazaxıstan, Belarus, Ukrayna, Moldova, habelə Türkiyə, Estoniya, Latviya, Litva, Yunanıstan, İsrail və Keniyanın 150-dək idmançısı qələbə uğrunda mübarizə aparırlar. Ölkəmizi 12 idmançı təmsil edir.
Əvvəlcə çempionatın təntənəli açılış mərasimi keçirildi. Beynəlxalq Taekvondo Federasiyasının marşı altında hakimlər və idmançılar yarış meydançasına daxil oldular.
Çempionatın təşkilat komitəsinin sədri, Azərbaycan Taekvondo Federasiyasının prezidenti Kəmaləddin Heydərov yarışı açaraq, qonaqları və idmançıları salamladı, son illərdə, xüsusən ARDNŞ-ın birinci vitse-prezidenti, Milli Məclisin deputatı İlham Əliyevin MOK-un prezidenti seçiləndən sonra respublikamızda idmanın inkişafından danışdı, MOK-un rəhbərinin yarış iştirakçılarına səmimi salamlarını çatdırdı. O bildirdi ki, Azərbaycan Prezidenti Heydər Əliyevin gənclərə olan diqqəti və qayğısı nəticəsində bütün sahələrdə olduğu kimi, idmanda da böyük nailiyyətlər qazanılmışdır.
Avropa Taekvondo Federasiyasının baş katibi Gerrit Eysinq keçən ilin noyabrında ölkəmizə səfərini xatırlatdı və dedi ki, indi Azərbaycanda idman çox inkişaf etməkdədir. MOK-un və onun rəhbəri İlham Əliyevin dəstəyi ilə Taekvondo Federasiyasının uğurlarının nəticəsi olaraq 2005-ci ildə Azərbaycanda gənclər arasında Avropa çempionatı keçiriləcək və bu da ölkədə idmanın həmin növünün inkişafına təkan verəcəkdir.
Qonaq vurğuladı ki, Azərbaycan idmançılarının səviyyəsi çox yüksəkdir. Bu isə ölkə rəhbərliyinin idmana göstərdiyi qayğının, dəstəyin nəticəsidir. Qarşıdakı Olimpiya oyunlarına lisenziya turnirlərinin təşkili üçün namizəd ölkələrdən biri də Azərbaycandır və biz bunun nəticəsini fevralın 27-də Afinada keçiriləcək Assambleyada görəcəyik. Cənab Gerrit Eysinq qısa müddət ərzində həm idmanın inkişafı, həm də xarici əlaqələr sahəsində respublikamızda görülən işləri, dünya təşkilatları ilə səmərəli əməkdaşlığı yüksək qiymətləndirdi və dedi ki, bütün bunların nəticəsi kimi bugünkü yarış məhz Bakıda keçirilir.
MDB Taekvondo Federasiyasının Prezidenti Lesiq Samanço, gənclər, idman və turizm nazirinin birinci müavini Vaqif Əliyev çıxış edərək, bu yarışın Azərbaycanda keçirilməsini yüksək qiymətləndirdilər, beynəlxalq yarışların Bakıda təşkilinin ənənə xarakteri aldığını və bunun Prezident Heydər Əliyevin rəhbərliyi altında Azərbaycanda yaradılmış ictimai-siyasi sabitlik nəticəsində mümkün olduğunu vurğuladılar. Natiqlər Milli Olimpiya Komitəsinin prezidenti İlham Əliyevin bilavasitə köməyi nəticəsində idmanda köklü dəyişikliklərin baş verdiyini vurğuladılar, ölkəmizdə maddi-texniki bazası yüksək olan və dünya standartlarına cavab verən idman kompleksləri tikildiyini, on minlərlə gəncin idmanın sirlərinə yiyələnmək imkanı əldə etdiklərini bildirdilər.
Sonra Azərbaycanın dövlət himni səsləndirildi.
MDB məkanında taekvondo üzrə yeganə dünya çempionu olan Niyaməddin Paşayev respublikamızın bayrağını qaldırdı.
Çempionatın ilk günündə qızlar arasında final yarışında 49 kiloqram çəki dərəcəsində Azərbaycan idmançısı Gülarə Əzizova İsrail taekvondoçusu Natalya Orexovaya qalib gəldi. 57 kiloqram çəki dərəcəsində isə Mətanət Həsənova həlledici görüşdə Belarus atleti Lyudmila Smonkinaya uduzaraq ikinci yerə sahib oldu.
Kişilərin yarışında 68 kiloqram çəki dərəcəsində mübarizə aparan Niyaməddin Paşayev Belarus idmançısını böyük hesabla məğlub edərək, çempion adını qazandı. 80 kiloqram çəkidə isə Azərbaycan taekvondoçuları Rəşad Əhmədovla Fəqan Umudovun görüşü gərgin mübarizə şəraitində keçdi və qalib adına Fəqan Umudov layiq görüldü.
Yanvarın 26-də çempionata yekun vurulacaqdır.
Foto Oqtay Aydınoğlunun və
İlqar Cəfərovundur
Bölmənin digər xəbərləri
