MDB İQTİSADİ ŞURASININ NÖVBƏTİ İCLASI
Dekabrın 20-də Moskvada, “Prezident-otel”də MDB İqtisadi Şurasının 14-cü iclası keçirilmişdir. İclasın işində Azərbaycan baş nazirinin birinci müavini Abbas Abbasov da iştirak etmişdir.
Birlik dövlətləri hökumətlərinin üzvləri gündəlikdə duran 15-dək məsələni müzakirə etmişlər. Əsas məsələ daha sıx iqtisadi inteqrasiya və MDB Hökumət Başçıları Şurasının iclasına hazırlıqla bağlı idi. Bundan əlavə, MDB dövlətlərinin iqtisadi sahədə qarşılıqlı fəaliyyətinin inkişafına dair təkliflər hazırlanması məsələləri də müzakirə olunmuşdur. Ekspertlərin fikrincə, bu bənd MDB-də bütün Birlik ölkələrinin əmtəə istehsalçıları və istehlakçıları üçün bərabər şəraiti təmin edən dinamik, rəqabət qabiliyyətli mallar və xidmətlər bazarlarının yaradılması sahəsində işlərin başa çatdırlmasında ciddi səylər göstərilməsini tələb edir.
İclasda inteqrasiyalı valyuta bazarının təşkili sahəsində MDB dövlətlərinin əməkdaşlığı və fəaliyyətinin əlaqələndirilməsi məsələsi də müzakirə olunmuşdur. Həmin məsələ üzrə məruzəçilərin fikrincə, MDB-nin inteqrasiyalı valyuta bazarı Birlik ölkələrinin milli valyutaları ilə konversiya əməliyyatları aparılması üçün vahid informasiya, ticarət və ödəniş məkanı yaradılmasını nəzərdə tutur. MDB-nin inteqrasiyalı valyuta bazarının yaradılmasından əsas məqsəd Birlik ölkələrinin milli valyutaları ilə konversiya əməliyyatları aparılması üçün səmərəli infrastruktur qurmaqdan və nəticə etibarilə qarşılıqlı hesablaşmalarda onlardan istifadə edilməsini xeyli artırmaqdan ibarətdir.
Bununla yanaşı, iclasda MDB dövlətlərinin elektrik enerjisi sistemlərinin paralel işləməsini təmin etmək haqqında müqavilənin yerinə yetirilməsinə dair tədbirlər planının həyata keçirilməsinin gedişi, “MDB ölkələrinin elmi-texniki və sənaye kompleksinin innovasiya potensialının və innovasiya infrastrukturunun vəziyyətinin və inkişaf meyllərinin öyrənilməsi” haqqında kompleks elmi tədqiqat işinin yerinə yetirilməsinin gedişi, istehsal əməliyyatlarının və texnoloji əməliyyatların şərtləri siyahısına dəyişikliklər və əlavələr, habelə MDB orqanlarının vahid büdcəsinin icrasının gedişi, MDB orqanlarının vəzifəli şəxslərinin və əməkdaşlarının hüquqi statusu haqqında saziş, Birlik orqanlarının vahid büdcəsindən maliyyələşdirilən MDB orqanlarında əmək haqqının ödənilməsi şərtləri də müzakirə olunmuşdur.
Cari ildə görülmüş işlərə yekun vurulmuş və MDB İqtisadi Şurasının növbəti iclasını gələn ilin martında keçirmək qərara alınmışdır.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
