Məktəbdə “Xocalı” tamaşası nümayiş olunmuşdur
Bakı, 25 fevral (AZƏRTAC). Bakı şəhərindəki 190 nömrəli orta məktəbdə Xocalı soyqırımının iyirminci ildönümünə həsr olunmuş tədbir çərçivəsində “Xocalı” tamaşası nümayiş etdirilmişdir.
AZƏRTAC xəbər verir ki, tamaşadan əvvəl məktəblilərin Xocalı soyqırımı mövzusunda çəkdikləri rəsmlərə baxış olmuş və faciənin qurbanları bir dəqiqəlik sükutla yad edilmişlər.
Məktəbin direktoru Afət Bakıxanova Xocalı soyqırımının mahiyyəti və acı nəticələri barədə tədbir iştirakçılarına məlumat vermişdir.
Tamaşa Mədəniyyət və Turizm Nazirliyinin dəstəyi, “Aytam” Uşaqların Mədəni Maariflənməsi İctimai Birliyinin təşkilatçılığı ilə təqdim olunmuşdur.
Azərbaycan Dövlət Musiqili Komediya Teatrının nəzdində fəaliyyət göstərən “Günay” Uşaq Teatrının ifasında nümayiş olunmuş tamaşa şairə Zərəngiz Dəmirçi Qayalının “Cavab ver” poeması əsasında səhnələşdirilmişdir.
Böyük maraqla izlənilmiş tamaşanın rejissoru Larisa Tarusova, baletmeyster Günəş Talıblıdır.
Bölmənin digər xəbərləri
