Memarlıq, şəhərsalma və dövlətçilik: Heydər Əliyev irsinin müasir Azərbaycan modelində rolu
Bakı, 8 may, AZƏRTAC
Mayın 8-də Elm və Təhsil Nazirliyinin N.Tusi adına Şamaxı Astrofizika Rəsədxanasının Bakı və Şamaxı bölmələrində Ümummilli Lider Heydər Əliyevin anadan olmasının 103-cü ildönümünə həsr edilmiş “Memarlıq, şəhərsalma və dövlətçilik: Heydər Əliyev irsinin müasir Azərbaycan modelində rolu” mövzusunda tədbir keçirilib.
Bu barədə AZƏRTAC-a rəsədxanadan məlumat verilib.
Tədbirdə rəsədxananın baş direktoru, AMEA-nın müxbir üzvü Namiq Cəlilov bildirib ki, Ümummilli Lider Heydər Əliyev müasir Azərbaycan dövlətçiliyinin formalaşması və inkişafında müstəsna xidmətlər göstərib. Ulu Öndərin müəyyənləşdirdiyi siyasi kurs ölkədə sabitliyin təmin olunması, iqtisadi inkişafın sürətləndirilməsi, milli maraqların qorunması və Azərbaycanın beynəlxalq aləmdə mövqeyinin gücləndirilməsi baxımından fundamental əhəmiyyət daşıyıb.
N.Cəlilov vurğulayıb ki, Heydər Əliyevin dövlətçilik fəlsəfəsində şəhərsalma və memarlıq məsələləri də xüsusi yer tutub. Onun rəhbərliyi dövründə Azərbaycanın şəhər infrastrukturunun inkişafı, memarlıq irsinin qorunması və müasir urbanizasiya prinsiplərinin tətbiqi istiqamətində mühüm addımlar atılıb. Bildirilib ki, 2026-cı ilin ölkəmizdə “Şəhərsalma və Memarlıq İli” elan olunması da bu strateji xəttin davamı kimi xüsusi əhəmiyyət kəsb edir.
Baş direktor qeyd edib ki, Azərbaycanın şəhərsalma sahəsində əldə etdiyi nailiyyətlər beynəlxalq səviyyədə də diqqət mərkəzindədir. Bu baxımdan Bakıda keçiriləcək Dünya Şəhərsalma Forumunun On Üçüncü Sessiyası (WUF13) ölkəmizin qlobal urbanizasiya, dayanıqlı inkişaf və müasir şəhər idarəçiliyi sahəsində artan rolunun göstəricisidir. Belə mötəbər beynəlxalq platformaya ev sahibliyi etmək Azərbaycanın şəhərsalma, memarlıq və dayanıqlı inkişaf istiqamətində həyata keçirdiyi siyasətin beynəlxalq səviyyədə yüksək qiymətləndirilməsinin bariz nümunəsidir.
Elmi əlaqələr və təşkilati məsələlər şöbəsinin müdiri Kamal Hüseynov çıxışında Heydər Əliyevin dövlətçilik fəlsəfəsinin əsas istiqamətlərindən biri olan azərbaycançılıq ideologiyasının milli kimliyin qorunması, milli-mənəvi dəyərlərin yaşadılması və xalqın birliyinin möhkəmləndirilməsi baxımından əhəmiyyətindən bəhs edib.
Planetlər və kiçik səma cisimləri şöbəsinin baş elmi işçisi, AMEA-nın müxbir üzvü Əyyub Quliyev çıxışında qeyd edib ki, Heydər Əliyevin rəhbərliyi dövründə elm, təhsil və milli kadr potensialının inkişafı dövlət siyasətinin prioritet istiqamətlərindən biri olub.
Şamaxı bölməsində keçirilən tədbirdə rəsədxananın icraçı direktoru professor Nəriman İsmayılov qeyd edib ki, Ümummilli Lider Heydər Əliyevin siyasi irsi Azərbaycanın dövlət müstəqilliyinin möhkəmləndirilməsi, milli maraqların qorunması və dövlət idarəçiliyi sisteminin təkmilləşdirilməsi baxımından əhəmiyyət kəsb edir. Ulu Öndərin rəhbərliyi ilə formalaşdırılan inkişaf strategiyası ölkənin müxtəlif sahələrində sistemli islahatların həyata keçirilməsinə, idarəetmə mexanizmlərinin təkmilləşdirilməsinə və uzunmüddətli inkişaf prioritetlərinin müəyyənləşdirilməsinə imkan yaradıb.
Tədbirdə Ulu Öndərin keçdiyi şərəfli ömür yolundan bəhs edən videoçarx nümayiş etdirilib.
Rəsədxana əməkdaşları Ümummilli Liderin Şamaxı şəhərində yerləşən abidəsini ziyarət edib, önünə gül dəstələri qoyublar.
Bölmənin digər xəbərləri
