MİLLİ MƏCLİSDƏ GÖRÜŞLƏR
Ziyafət Əsgərov bildirdi ki, Azərbaycan müstəqilliyini bərpa etdikdən sonra bütün beynəlxalq təşkilatlarla sıx əməkdaşlıq edir və Qərbə inteqrasiya ölkəmizin xarici siyasətinin əsas istiqamətlərindən biridir. NATO PA ilə əlaqələrə də xüsusi diqqət yetirilir. Azərbaycan NATO-nun bir sıra sahələrində, o cümlədən terrorizmə qarşı mübarizədə çox fəal iştirak edir.
Azərbaycanın sürətli sosial-iqtisadi inkişafından, həyata keçirilən irimiqyaslı layihələrdən söhbət açan Z.Əsgərov dedi ki, hesab edirik, böyük irəliləyişlərdən xəbər verən bu layihələr Avropanın da diqqət və maraq mərkəzindədir. Amma təəssüflər olsun ki, inkişafımıza mane olan ciddi problemlər də vardır. Onlardan biri də Ermənistan-Azərbaycan, Dağlıq Qarabağ münaqişəsidir. Problemin həlli ilə birbaşa ATƏT-in Minsk qrupu məşğul olur, lakin indiyədək heç bir irəliləyiş yoxdur. Ermənistan tərəfi münaqişənin həlli ilə bağlı beynəlxalq təşkilatların qətnamə və qərarlarına məhəl qoymur. Hesab edirik ki, NATO da bu məsələ ilə bağlı öz sözünü deməlidir.
Nümayəndə heyətinin rəhbəri Vahid Ərdəm Azərbaycanda onlara göstərilən qonaqpərvərliyə və verilən ətraflı məlumata görə minnətdarlıq edərək bildirdi ki, NATO Cənubi Qafqaza böyük maraq göstərir. Cənubi Qafqaz ölkələri, xüsusən də Azərbaycanla əlaqələrin inkişafı qurum üçün çox mühümdür. Dünyada ciddi problemlər yaşanır - terror, enerji böhranı və s. - ona görə də birgə əməkdaşlıq olduqca vacibdir.
Bundan əvvəl Ermənistanda və Gürcüstanda olduqlarını xatırladan qonaq dedi ki, məqsədimiz NATO-da Azərbaycanla bağlı informasiyanı artırmaq, ölkədə həyata keçirilən islahatlar, qonşu dövlətlərlə münasibətlər, demokratiyanın inkişafı və s. barədə məlumatlar əldə etməkdir. Bilirik ki, Azərbaycan regionda çox böyük rola malikdir, zəngin neft ehtiyatlarınız, böyük enerji layihələriniz vardır. Bu, həm Türkiyənin, həm də Qərbin maraq dairəsindədir. Bundan sonra NATO ilə Azərbaycan arasında əlaqələrin inkişaf perspektivlərini bir daha nəzərdən keçirəcəyik. Dağlıq Qarabağ münaqişəsinin bu günə qədər həll olunmamasından da təəssüflənirik. NATO münaqişənin sülh yolu ilə həllinə tərəfdardır və ümid edirik ki, bu sahədə irəliləyiş olacaqdır.
Görüşdə qarşılıqlı maraq doğuran məsələlər ətrafında geniş fikir mübadiləsi aparıldı.
X X X
Həmin gün nümayəndə heyəti Milli Məclisin beynəlxalq münasibətlər və parlamentlərarası əlaqələr daimi komissiyasının sədri, Avropa Şurası Parlament Assambleyasındakı Azərbaycan nümayəndə heyətinin rəhbəri Səməd Seyidov ilə görüşmüşdür.
S.Seyidov bildirdi ki, Azərbaycan sürətlə Avropaya, Avratlantik məkana inteqrasiya edir. Azərbaycan Prezidenti İlham Əliyevin Almaniyaya səfəri və Milli Məclisin payız sessiyasının açılşında bəyan etdiyi kimi, biz öz seçimimizi etmişik. Avropaya inteqrasiya, Avropa ailəsinə daxil olmaq bizim xarici siyasətimizin əsas istiqamətlərindən biridir. NATO ilə də əlaqələrimiz inkişaf edir və bunda çox maraqlıyıq.
Daimi komissiyanın sədri dedi ki, NATO-da Cənubi Qafqaz ölkələri ilə bağlı məruzə hazırlanır və onda bir sıra qeyri-dəqiq məlumatlar vardır. Ermənistanın Azərbaycan torpaqlarının 20 faizini işğal etməsi və bu işğal nəticəsində 1 milyondan çox azərbaycanlının qaçqın və məcburi köçkün düşməsi, Dağlıq Qarabağın əzəli Azərbaycan torpaqları olması faktları sənəddə düzgün əks olunmalıdır. Bu faktlar BMT Təhlükəsizlik Şurasının qətnamələrində, Avropa Şurasının, eləcə də ATƏT-in özünün sənədlərində əksini tapmışdır. Ümid edirik ki, səfərdən sonra sənəd üzərində ciddi dəyişikliklər ediləcəkdir.
Nümayəndə heyətinin rəhbəri Vahid Ərdəm bildirdi ki, səfərdən məqsəd həm də sadalanan faktlarla bağlı ətraflı məlumat toplamaqdır. Məruzədə bir sıra yanlışlıqların olduğu məlumdur. Səfərdən sonra biz sənəd üzərində bir daha işləyəcək və qeyri-dəqiqlik aradan qaldırılacaqdır.
Daimi komissiya üzvlərinin də iştirak etdiyi görüşdə məsələlər ətrafında fikir mübadiləsi edildi.
Bölmənin digər xəbərləri
