Milli Məclisin növbəti plenar iclası keçirilib
Bakı, 29 noyabr, AZƏRTAC
Noyabrın 29-da Milli Məclisin növbəti plenar iclası keçirilib.
AZƏRTAC xəbər verir ki, iclası açan Milli Məclisin Sədri Oqtay Əsədov gündəlik barədə məlumat verib. Bildirilib ki, gündəlikdə 22 məsələ var. Bunlardan ilk 11 məsələ 2020-ci ilin dövlət büdcəsi zərfinə daxil olan sənədlərin üçüncü oxunuşudur.
Gündəlik təsdiqləndikdən sonra İqtisadi siyasət, sənaye və sahibkarlıq komitəsinin sədri Ziyad Səmədzadə “Azərbaycan Respublikasının 2020-ci il dövlət büdcəsi haqqında” qanun layihəsi barədə (üçüncü oxunuş) məlumat verib. Bildirib ki, gələn ilin büdcə zərfinə daxil olan sənədlər Milli Məclisin komitələrində ətraflı müzakirə edilib. Deputatlar ölkə iqtisadiyyatının daha davamlı və keyfiyyətli inkişafına xidmət edən kifayət qədər maraqlı və səmərəli təkliflər irəli sürüblər. Azərbaycan hökumətinin müvafiq strukturları, əlaqədar nazirliklər deputatların təklifləri ilə bağlı xeyli işlər görüblər.
Məlumat dinlənildikdən sonra qanun layihəsi səsə qoyularaq üçüncü oxunuşda qəbul edilib.
Sonra Əmək və sosial siyasət komitəsinin sədri Hadi Rəcəbli gündəlikdəki növbəti 2 qanun layihəsini təqdim edib. Bildirib ki, “Sosial təminatı və müdafiəni həyata keçirən müvafiq icra hakimiyyəti orqanının 2020-ci il büdcəsi haqqında”, “Azərbaycan Respublikasında 2020-ci il üçün ehtiyac meyarının həddi haqqında” qanun layihələri geniş müzakirə olunub və razılıqla qarşılanıb.
“İşsizlikdən sığorta fondunun 2020-ci il dövlət büdcəsi haqqında” və “Azərbaycan Respublikasında 2020-ci il üçün yaşayış minimumu haqqında” qanun layihələrinin üçüncü oxunuşu barədə isə İqtisadi siyasət, sənaye və sahibkarlıq komitəsinin sədri Ziyad Səmədzadə məlumat verib. Məlumat dinlənildikdən sonra 4 qanun layihəsi ayrı-ayrılıqda səsə qoyularaq üçüncü oxunuşda qəbul edilib.
İclasda bildirilib ki, “Əmək pensiyaları haqqında” Qanunun 6-1-ci və 14.4-cü maddələrinə edilən dəyişiklik vətəndaşların sosial durumunun yaxşılaşdırılmasına xidmət edir. Layihə üçüncü oxunuşda təsdiqlənib. “Məşğulluq haqqında” Qanunda edilən dəyişiklik də üçüncü oxunuşda məqbul sayılıb. “Sosial müavinətlər haqqında” Qanunda ailənin maddi vəziyyətinin yaxşılaşdırılması məqsədi daşıyan dəyişiklik (üçüncü oxunuş) razılıqla qarşılanıb. Parlament Vergi Məcəlləsində edilən dəyişikliklərə də (üçüncü oxunuş) müsbət münasibət bildirib.
Deputatlar Azərbaycan Respublikası Milli Məclisinin 2020-ci il üçün xərclər smetası haqqında və Azərbaycan Respublikası Hesablama Palatasının 2020-ci il üçün xərclər smetası haqqında qanun layihələrini də təsdiqləyiblər.
Gündəlikdəki növbəti məsələ - Azərbaycan Respublikasının İnsan hüquqları üzrə müvəkkilinin (Ombudsmanın) seçilməsi haqqında parlament Sədrinin müavini, İnsan hüquqları komitəsinin sədri Bahar Muradova məlumat verib. Bildirib ki, 2019-cu il 15 noyabr tarixdə Azərbaycan Prezidentinin imzası ilə parlamentə məktub daxil olub. Məktubda dövlətimizin başçısı insan hüquqları üzrə müvəkkilin seçilməsi üzrə namizədlərini təqdim edib. İnsan hüquqları komitəsinin sədri diqqətə çatdırıb ki, komitə ombudsmanlığa təklif edilən şəxslərin namizədliyinə baxıb və bunu parlamentin plenar iclasına təqdim edib. Namizədlər cəmiyyətdə tanınan insanlardır və onların hər biri şəxsi keyfiyyətlərinə görə bu vəzifəni tuta bilər.
Səbinə Əliyevanın, Kəmalə Əliyevanın və Kəmalə Abıyevanın namizədliyi ayrı-ayrılıqda səsə qoyulub. Səbinə Əliyeva səs çoxluğu ilə İnsan hüquqları üzrə müvəkkil (ombudsman) vəzifəsinə seçilib.
Sonra yeni seçilmiş ombudsman Səbinə Əliyeva vəzifəsinin icrasına başlamaqla əlaqədar deputatlar qarşısında and içib, Prezident İlham Əliyevə və deputatlara ona göstərilən etimada görə təşəkkürünü bildirib.
Daha sonra plenar iclasda məhkəmə-hüquq sistemində islahatlarla bağlı parlamentə bir zərfdə daxil olmuş 9 qanun layihəsinin üçüncü oxunuşda müzakirəsi başlanıb.
Hüquq siyasəti və dövlət quruculuğu komitəsinin sədri Əli Hüseynli bildirib ki, təqdim olunan qanun layihələrindəki dəyişikliklər iki əsas mahiyyət daşıyır: birincisi, vahid məhkəmə təcrübəsinin yaranması; ikincisi, dövlət ekspertizası ilə yanaşı, özəl ekspertizanın da olması. Komitə sədri ikinci oxunuşdan sonra layihədə aparılmış dəyişikliklərdən bəhs edib. Vurğulayıb ki, vahid məhkəmə təcrübəsinin yaranması “Məhkəmə-hüquq sistemində islahatların dərinləşdirilməsi haqqında” Prezidentin Fərmanında verilmiş tövsiyənin ən vacib elementidir. Məqsəd bu sistemdə mövcud olan problemlərin həllidir.
Məlumat dinlənildikdən sonra “Məhkəmələr və hakimlər haqqında”, “Dövlət məhkəmə ekspertizası fəaliyyəti haqqında”, “İnzibati icraat haqqında”, “Məhkəmə-Hüquq Şurası haqqında”, “Lisenziyalar və icazələr haqqında” qanunlarda və 4 Məcəllədə - Mülki Prosessual, Cinayət-Prosessual, İnzibati Prosessual və İnzibati Xətalar məcəllələrində dəyişiklik edilməsi barədə qanun layihələri üçüncü oxunuşda qəbul edilib.
İclasda “Tibbi sığorta haqqında” Qanuna dəyişiklik edilməsi barədə (ikinci oxunuş) məsələ də müzakirə edilib.
Səhiyyə komitəsinin sədri Əhliman Əmiraslanov bildirib ki, gələn ildən etibarən ölkəmizdə icbari tibbi sığortaya keçidlə bağlı “Tibbi sığorta haqqında” Qanunun 8 maddəsinə 126 dəyişiklik təklif olunur. İcbari tibbi sığorta Prezident İlham Əliyev tərəfindən həyata keçirilən sosial islahatların ən vacib komponentlərindən biridir, çox böyük bir sosial proqramdır. Komitə sədri qanun layihəsinin birinci oxunuşda müzakirəsindən sonra layihəyə edilmiş dəyişiklikləri diqqətə çatdırıb.
Sonra qanun layihəsi səsə qoyularaq ikinci oxunuşda qəbul edilib.
Bununla da Milli Məclisin növbəti plenar iclası başa çatıb.
Bölmənin digər xəbərləri
