ELM VƏ TƏHSİL
Milli qurtuluşun təvəllüd günü
Bakı, 14 iyun, AZƏRTAC
Bərpa etdiyimiz müstəqilliyimizə, əldən getməkdə olan milli dövlətçiliyimizə qurtuluş gətirilməsinin təməli Ulu Öndər Heydər Əliyevin siyasi hakimiyyətə qayıtmağı ilə qoyulsa da, həmin qurtuluşun gününün qanunvericilik səviyyəsində rəsmiləşdirilməsi məhz 1997-ci ilin iyun ayının bəxtinə düşmüşdü. Ölkə əhalisinin müxtəlif zümrələri tərəfindən irəli sürülən həmin təklifin əhatəli şəkildə müzakirəsindən və ətraflı qiymətləndirilməsindən sonra qəbul edilmiş bu qərara əsasən artıq 26 ildir ki, iyunun 15-ni Milli Qurtuluş Günü kimi qeyd edirik.
Bu fikirləri AZƏRTAC-a açıqlamasında AMEA-nın A.A.Bakıxanov adına Tarix İnstitutunun Azərbaycan Respublikası tarixi şöbəsinin aparıcı elmi işçisi tarix üzrə fəlsəfə doktoru dosent Alı Balayev söyləyib.
Onun sözlərinə görə, iyunun 15-i müstəqil Azərbaycanın siyasi tarixinin ən məsul və şanlı günlərindən biridir.
“Həmin il Milli Məclisin iclasında Heydər Əliyev Ali Sovetin sədri seçildi. Milli Məclisin adıçəkilən qərarında qeyd edilirdi ki, Heydər Əliyev siyasi hakimiyyətə qayıtdığı ilk gündən elə bir dövlət qurmağa başladı ki, bu dövlət həm özünü, həm də vətəndaşlarını qorumağa tam qadir olduğunu dönə-dönə sübut etmişdi. 1993-cü ilin sonu-1994-cü ilin əvvəllərində Azərbaycan Ordusunun cəbhədəki uğurları, 1994-cü ilin mayında atəşkəs haqqında sazişin imzalanması, həmin ilin sentyabrında Bakıda dünyanın aparıcı neft şirkətləri ilə “Əsrin müqaviləsi”nin bağlanması, dövlət aparatının təkmilləşdirilməsi və Milli Ordunun qurulması, ölkədaxili vəziyyətin sabitləşdirilməsi, dünya miqyasında Azərbaycana marağın artması və dünyanın iri dövlətlərinin xalqımızın haqq işini dəstəkləməyə başlaması, mahir siyasətçinin Lissabon sammitində siyasi qələbəsi, Azərbaycan Prezidentinin uğurlu xarici səfərləri bu inamı daha da qüvvətləndirirdi. Son dərəcə mürəkkəb və qarışıq bir şəraitdə siyasi hakimiyyət sükanı arxasına keçən Heydər Əliyev qısa müddət ərzində Azərbaycanı öz vətəndaşları üçün sabitliyin, vətəndaş həmrəyliyinin, əmin-amanlığın hökm sürdüyü, demokratik təsisatların fəaliyyəti üçün geniş şərait yaradıldığı bir ölkəyə, xarici sərmayəçilər üçün isə əlverişli imkanlar açan, hərtərəfli əməkdaşlığa hazır olan bir tərəfdaşa çevirdi. Fəlakət qarşısında qalan Azərbaycan güclü Ümummilli Liderin əzmi və iradəsi ilə düşdüyü ağır vəziyyətdən qurtardı, qısa müddət ərzində beynəlxalq birliyin tamhüquqlu üzvlərindən birinə çevrildi. Dünya siyasətçiləri arasında öz yeri olan Azərbaycan Prezidenti böyük nüfuzu və siyasi iradəsi sayəsində rəhbəri və qurucusu olduğu dövlətə də belə bir nüfuz qazandırmağa nail oldu. Bir əsrdə ikinci dəfə milli dövlətçiliyi dağılmaq təhlükəsi qarşısında qalan Azərbaycan xalqı yalnız Heydər Əliyev dühasına arxalanaraq öz dövlətini qorudu, qurdu və möhkəmləndirdi. Xalq öz böyük, sınanmış liderinin sayəsində milli qurtuluşa nail oldu. Adıçəkilən tarixi qərarda qeyd edilirdi ki, Heydər Əliyev dövlət quruculuğu sahəsində başladığı böyük işi məntiqi şəkildə davam etdirərək müstəqil Azərbaycan Respublikasının ilk Konstitusiyasının hazırlanmasına rəhbərlik etdi. Azərbaycanın siyasi tarixində yeni bir mərhələ açan və onun dövlət müstəqilliyinin, cəmiyyətdə insan azadlığının və demokratik dəyərlərin əsas qarantına çevrilən bu Konstitusiya 1995-ci il noyabrın 12-də referendum yolu ilə qəbul edildi. İlk dəfə olaraq demokratik şəraitdə çoxpartiyalılıq əsasında Azərbaycan parlamenti - Milli Məclisi seçildi. Azərbaycan Respublikası dünyanın azad, suveren, müstəqil dövlətləri arasında özünə layiq yerini tutdu. Məhz həmin tarixi faktların və əməli fəaliyyətin nəticəsidir ki, bu gün müstəqil Azərbaycan Respublikası Prezident İlham Əliyevin rəhbərliyi altında regionun lider dövlətinə çevrilib. Dünya miqyasındakı uğurlarımızın gündən-günə artması bir daha sübut edir ki, Ulu Öndər Heydər Əliyev bizim üçün ən mükəmməl, ən sərfəli siyasi kurs və dövlət idarəçiliyi prinsipləri işləyib hazırlayaraq bizlərə ərməğan edib”, - deyə Alı Balayev fikrini yekunlaşdırıb.