Mingəçevir Dövlət Universitetində “Velopark - sağlam gənclik, yaşıl kampus” layihəsinin təqdimatı keçirilib
Mingəçevir, 16 noyabr, Vüsalə Cənnətova, AZƏRTAC
Mingəçevir Dövlət Universiteti (MDU), Gənclər və İdman Nazirliyinin təşkilatçılığı və Azərbaycan Velosiped İdmanı Federasiyasının (AzVİF) tərəfdaşlığı ilə reallaşdırılan “Velopark – sağlam gənclik, yaşıl kampus” layihəsinin açılış mərasimi keçirilib.
Rəmzi veloyürüşlə başlayan tədbirdə 70 tələbə qızdan ibarət qrup MDU-nun əsas tədris binasının qarşısından start götürərək Kür Olimpiya Tədris-İdman Mərkəzinin qarşısında finiş edib.
Tədbirdə Ümummilli Lider Heydər Əliyevin, şəhidlərimizin, noyabrın 11-də təyyarə qəzasında həlak olmuş türkiyəli hərbçilərin əziz xatirəsi bir dəqiqəlik sükutla yad edilib və Dövlət Himni səsləndirilib.
MDU-nun rektoru Anar Eminov çıxışında layihənin ölkəmizdə sağlam həyat tərzinin təşviqi və gənclərin idmana cəlb olunması istiqamətində həyata keçirilən dövlət siyasətinə uyğun olduğunu qeyd edib. O, layihənin MDU-nun strateji hədəfləri ilə uzlaşdığını, xüsusilə regionlardan olan tələbə qızların sosial fəallığının və fiziki aktivliyinin artırılmasına mühüm töhfə verəcəyini vurğulayıb. Rektor bildirib ki, federasiya tərəfindən 70 tələbə qıza təqdim olunan velosipedlər layihənin maddi-texniki bazasının möhkəmlənməsinə və daha geniş tələbə auditoriyasının prosesə cəlb edilməsinə şərait yaradıb.
Gənclər və idman naziri Fərid Qayıbov layihənin regionlarda və universitet mühitində sağlam və aktiv gəncliyin formalaşmasına verdiyi töhfələri qeyd edib. Nazir bildirib ki, MDU-nun veloinfrastukturu tələbələrin idmanla mütəmadi məşğul olması üçün əlçatan və davamlı imkanlar yaradır. Bu təşəbbüs ali təhsil müəssisələrində idmana marağın artmasına müsbət təsir göstərəcək. Nazir layihənin hazırlanması və icrasında nümayiş etdirilən əməkdaşlığı yüksək qiymətləndirib, gənclərin fiziki aktivliyini artıran belə təşəbbüslərin gələcəkdə də dəstəklənəcəyini vurğulayıb.
AzVİF-in vitse-prezidenti Fikrət Hüseynov çıxışında layihənin regionlarda idman infrastrukturunun inkişafına verdiyi töhfəni xüsusi qeyd edib. O bildirib ki, MDU-da yaradılan velosiped parkı tələbələr və şəhər ictimaiyyəti üçün yeni vərdişlərin formalaşmasına və sağlam həyat tərzinin təşviqinə xidmət edəcək. Fikrət Hüseynov federasiyanın bu təşəbbüsə verdiyi dəstəyin gənclər arasında velosiped idmanının kütləviləşdirilməsi istiqamətində həyata keçirdiyi fəaliyyətlərlə uyğun olduğunu bildirib və universitetlə əməkdaşlığın davamlı olacağını vurğulayıb.
Yeni Azərbaycan Partiyasının Mingəçevir şəhər təşkilatının sədri Bəxtiyar Mustafayev çıxışında ölkəmizdə gənclərin hərtərəfli inkişafının dövlət siyasətinin prioritet istiqamətlərindən biri olduğunu bildirib. O vurğulayıb ki, Ümummilli Lider Heydər Əliyevin müəyyənləşdirdiyi və Prezident İlham Əliyev tərəfindən müasir dövrün tələblərinə uyğun şəkildə uğurla davam etdirilən gənclər siyasəti onların sağlam, fəal və vətənpərvər ruhda yetişməsinə geniş imkanlar yaradır. Bəxtiyar Mustafayev layihənin bu siyasətin tərkib hissəsi kimi Mingəçevirdə gənclərin fiziki aktivliyinin, sosial inteqrasiyasının və sağlam həyat tərzi vərdişlərinin gücləndirilməsinə mühüm töhfə verəcəyini qeyd edib.
Daha sonra layihənin təşkilati işlərində fəallığı ilə seçilən şəxslərə təşəkkürnamələr təqdim olunub, layihəyə seçilən 70 tələbə qıza isə sertifikat verilib.
Bu il sentyabrın 10-dan elan edilən layihə üçün 400-dən çox tələbə qız müraciət edib. Seçim mərhələlərini uğurla başa vuran iştirakçılar maarifləndirici təlimlərdə, veloyürüş kurslarında və şəhər turlarında iştirak edərək öz bilik və bacarıqlarını təkmilləşdiriblər. Bu fəaliyyət yalnız idman vərdişlərinin artırılmasına deyil, həm də komanda ruhu, liderlik, təhlükəsizlik mədəniyyəti və ekoloji məsuliyyət kimi dəyərlərin formalaşdırılmasına xidmət edib. Layihənin sonunda formalaşan yeni velosipedçi qızlar qrupu MDU-nun “Yaşıl kampus” hərəkatının fəal simalarından birinə çevrilib. “Velopark – sağlam gənclik, yaşıl kampus” layihəsi Mingəçevir Dövlət Universitetində təkcə yeni idman məkanının istifadəyə verilməsi deyil, həm də sağlamlıq, ekoloji düşüncə və tələbə həmrəyliyi kimi dəyərlərin möhkəmlənməsi baxımından mühüm addımdır. Layihə növbəti mərhələlərdə daha geniş tələbə auditoriyasını əhatə edəcək və MDU-nun müasir kampus modelinə doğru inkişafını sürətləndirəcək.
Bölmənin digər xəbərləri
