MİSİR RƏHBƏRLİYİ NATO BAŞ KATİBİNİN MÜAVİNİNİ QƏBUL ETMƏKDƏN İMTİNA ETMİŞDİR

14.05.2004 [16:14]
Çap et
A⁺ A^-

AZƏRTAC xəbər verir ki, “Əş-Şərq Əlövsət” ümumərəb qəzetinin yazdığına görə, Misir rəhbərliyi Aralıq dənizi ölkələrinə səfərə çıxan NATO baş katibinin müavini Alessandro Minuto Ritssonu qəbul etməkdən imtina etmişdir. Misirin xarici işlər naziri Əhməd Mahir vurğulamışdır ki, Qahirə Yaxın Şərqdə islahatlar prosesinə NATO-nun müdaxiləsini rədd edir. Odur ki, NATO rəhbərliyi strukturunda ikinci şəxsin Misirə səfəri məqsədəuyğun deyildir.

Ə.Maheir demişdir: “Biz islahatlar haqqında hər hansı dialoqu alqışlayırıq, amma istəmirik ki, bizə hökm etsinlər, yaxud hər hansı ideyanı zorla qəbul etdirsinlər”.

Xatırladaq ki, yeddi Aralıq dənizi ölkəsi (Misir, İsrail, İordaniya, Mavritaniya, Əlcəzair, Mərakeş, Tunis) NATO ilə “Aralıq dənizi dialoqu”nda birləşmişdir. 1994-cü ildən bəri onlarla Şimali Atlantika bloku arasında müntəzəm olaraq məsləhətləşmələr aparılır.

NATO baş katibinin müavinini bu ölkələrdən yalnız Misir qəbul etməmişdir.