AZƏRTAC-ın İTAR-TASS agentliyindən aldığı xəbərdə bildirilir ki, Rusiyanın xarici işlər naziri Sergey Lavrovun və Rusiya Müftilər Şurasının (RMŞ) sədri Ravil Qaynuddinin görüşündə payızda Moskvada keçiriləcək “İslam: dünya birliyi və ekstermizmlə mübarizə” mövzusunda beynəlxalq konfransa hazırlıq məsələləri müzakirə edilmişdir.

Onlar Rusiyanın xarici siyasət idarəsi ilə Müftilər Şurası arasında gələcək qarşılıqlı fəaliyyətə dair məsələləri nəzərdən keçirmiş, müsəlman ölkələri ilə əməkdaşlığı ətraflı araşdırmış və İslam Konfransı Təşkilatı (İKT) dövlətləri ilə əlaqələrin inkişafına qiymət vermişlər.

RMŞ-nin mətbuat xidməti bildirmişdir ki, “XİN rəhbəri Müftilər Şurasının Rusiya ilə İslam dünyası arasında beynəlxalq əlaqələrin genişlənməsinə, ilk növbədə, sülhün qorunmasına yönəldilmiş səylərini yüksək qiymətləndirmişdir”.

Xatırladaq ki, Rusiya paytaxtında belə mötəbər forum keçirmək təşəbbüsünü İKT-nin baş katibi doktor Əbdülvahid Belqəziz irəli sürmüşdür.

Gözlənildiyinə görə, beynəlxalq konfransın təfərrüatını razılaşdırmaq üçün İKT ölkələri təmsilçilərinin xüsusi nümayəndə heyəti iyunun axırlarında Moskvaya gələcəkdir.