SİYASƏT
Moskvadakı Azərbaycan etnomədəni komponentli məktəbdə Novruz bayramı qeyd edilmişdir
Moskva, 26 mart (AZƏRTAC). Moskvadakı Kərim Kərimov adına Azərbaycan etnomədəni komponentli 157 nömrəli məktəbdə Novruz bayramı münasibətilə tədbir keçirilmişdir. Tədbirin əsas iştirakçıları məktəbin şagirdləri və onların valideynləri olmuşdur.
Məktəbin direktoru, Azərbaycanın və Rusiyanın Əməkdar Müəllimi Aida Quliyeva xalqımızın Novruz bayramı ilə bağlı qədim adət və ənənələri barədə ətraflı məlumat vermişdir. Tədbirin iştirakçılarını bayram münasibətilə təbrik edən A.Quliyeva onlara ən xoş arzularını bildirmişdir.
157 nömrəli məktəbin nəzdində yaradılmış Azərbaycan Mədəniyyəti Mərkəzinin direktoru, Azərbaycanın Əməkdar Artisti, uşaqlara milli musiqi alətlərində ifa etməyi öyrədən Qorxmaz Axundov Novruz bayramının xüsusiyyətləri barədə danışmışdır.
Sonra şagirdlər tərəfindən hazırlanmış rəngarəng musiqi proqramı təqdim edilmişdir.
Ən yaxşı bayram xonçası müsabiqəsi də böyük maraqla qarşılanmışdır.
Tədbir iştirakçıları Novruz şirniyyatlarına qonaq edilmişlər.
Asya Hacızadə
AZƏRTAC-ın xüsusi müxbiri,
Moskva