MÜDAFİƏ NAZİRLİYİ MƏTBUAT XİDMƏTİNİN MƏLUMATI
Yanvarın 14-də Azərbaycan Respublikasının müdafiə naziri general-polkovnik Səfər Əbiyev Amerika Birləşmiş Ştatlarının Azərbaycandakı fövqəladə və səlahiyyətli səfiri cənab Ross Uilsonu və yeni təyin olunmuş hərbi attaşesi Mark Casperi qəbul etmişdir.
Müdafiə naziri qonaqları salamladıqdan sonra hərbi attaşeni yeni təyinatı münasibətilə təbrik edərək gələcək işlərində ona uğurlar arzulamışdır.
Sonra Müdafi naziri Azərbaycan-ABŞ ikitərəfli münasibətlərinə toxunaraq, ölkəmiz müstəqillik əldə etdiyi müddət ərzində dövlətlərimiz arasında əməkdaşlıq əlaqələrinin yarandığını və bu əlaqələrin inkişaf etdiyini qeyd etmişdir. O demişdir: “Azərbaycan-ABŞ münasibətlərinə əngəl olan “Azadlığa dəstək aktı”na 907-ci düzəlişin ləğv olunması ikitərəfli əlaqələrimizin, o cümlədən hərbi əlaqələrin inkişafında yeni mərhələ yaradacaqdır”.
ABŞ tərəfindən aparılan antiterror əməliyyatlarına toxunan müdafiə naziri bildirmişdir ki, Azərbaycan Respublikası beynəlxalq terrorizmlə mübarizədə Amerika Birləşmiş Ştatları ilə bir alyansda olduğunu dərhal bəyan etmiş və antiterror əməliyyatlarının həyata keçirilməsinə əməli yardım göstərmək məqsədi ilə birləşmiş qüvvələrə hava dəhlizindən istifadə üçün icazə vermişdir.
General-polkovnik S.Əbiyev qonaqları Ermənistan-Azərbaycan münaqişəsində mövcud olan vəziyyətlə tanış edərək demişdir: “Azərbaycan xalqının ən böyük problemi işğal olunmuş torpaqlarının azad edilməsidir. Ermənistan işğalçı dövlətdir və o yaxşı başa düşür ki, işğal etdiyi əraziləri qeyd-şərtsiz boşaltmalıdır.
Bizi narahat edən həm də Ermənistan Respublikasının kütləvi qırğın silahına malik olmasıdır. Ermənistan ərazisində bu kimi silahların olması barədə məlumatlar bizə də bəlli idi. Artıq bu silahlar təkcə Azərbaycana deyil, həmçinin regionun digər dövlətlərinə də təhlükə yaradır. NATO üzvü olan dövlətin nümayəndələrinin Ermənistan ərazisində Kütləvi qırğın silahının olması bəyanatı ilə çıxış etməsi buna daha bir sübutdur.
Eyni zamanda, bu da danılmaz bir faktdır ki, bəzi dövlətlər tərəfindən silahlandırılan Ermənistan ordusunun uçotsuz hərbi texnika, silah və sursatı Azərbaycanın işğal olunmuş ərazilərində yerləşdirilir. Bu da öz növbəsində regionda gərginliyin artmasına səbəb olur”.
Müdafiə naziri ilə tam razı olduğunu bildirən səfir R.Uilson demişdir: “ Ümidvaram ki, “Azadlığa təstək aktı”na 907-ci düzəlişin ləğvi ikitərəfli hərbi münasibətlərimizin daha da inkişaf etməsinə təkan verəcəkdir. ABŞ hökumətinin məqsədi ilk növbədə Azərbaycan Respublikasının ərazi bütövlüyünün təhlükəsizliyi və bölgədə sabitliyinin bərpa olunmasıdır”.
Sonra tərəflər Cənubi Qafqaz regionunda mövcud olan ictimai və hərbi-siyasi vəziyyət barəsində geniş fikir mübadiləsi etmişlər.
X X X
NATO ilə Azərbaycan Respublikası arasında imzalanmış fərdi proqrama uyğun olaraq, “Sülh naminə tərəfdaşlıq” proqramı çərçivəsində yanvarın 14-dən 17-dək Bled şəhərində (Sloveniya) “Kooperativ Key - 2002” təlimlərinin ilkin planlaşdırma konfransı, yanvarın 14-dən fevralın 1-dək Vişkov şəhərində (Çexiya) Sülhü qoruma əməliyyatları kursu, Brüssel şəhərində (Belçika Krallığı) isə yanvarın 15-dən 17-dək NATO-SNT rabitə və informasiya agentliyinin rəhbərliyi ilə simpozium və yanvarın 15-dən 21-dək NATO-nun “Veriti” işçi görüşü keçiriləcəkdir. Tədbirlərdə Azərbaycan Respublikası Silahlı Qüvvələrinin nümayəndələri iştirak edəcəklər.
Bölmənin digər xəbərləri
