NASA AMERİKA SKAFANDRLARINDAN İMTİNA EDİR

25.05.2004 [23:06]
Çap et
A⁺ A^-

AZƏRTAC xəbər verir ki, Assoşieyted Pressin yaydığı məlumata görə, ABŞ Milli Aeronavtika və Kosmik Fəzanı Tədqiq Agentliyi (NASA) bildirmişdir ki, Beynəlxalq kosmik stansiyadakı Amerika istehsallı kosmik kostyumlar açıq kosmosa çıxmaq üçün yararsızdır və bu səbəbdən də astronavtlar Rusiya skafandrlarından istifadə edəcəklər.

Bundan əvvəl planlaşdırılmışdı ki, kosmonavtlar elektrik enerjisi təchizatı blokunun təmiri əməliyyatı zamanı açıq kosmosa Amerika skafandrlarında çıxacaqlar. Lakin NASA bu planlara yenidən baxmalı olmuşdur, çünki Amerika kostyumlarının soyutma sisteminin işində nasazlıq aşkar edilmişdir. Heyətin üzvləri Gennadi Padalka və Maykl Fink bir neçə gün nasazlığı aradan qaldırmağa çalışsalar da, nəticəsi olmamışdır.

NASA mayın 19-da açıq kosmosa çıxmaq üçün təşkil edilən və uğursuzluqla nəticələnən məşqdən sonra bu əməliyyatı iyunun 10-dan 16-na keçirmişdir.