NATO Parlament Assambleyasının prezidenti Rafael Estrella və bu təşkilatın baş katibi Saymon Lann yanvarın 17-də Bakıya rəsmi səfərə gəlmişlər. 

Binə hava limanında qonaqları Milli Məclisin sədri Murtuz Ələsgərov, parlament sədrinin müavini Ziyafət Əsgərov, Milli Məclis Aparatının rəhbəri Səfa Mirzəyev qarşıladılar.

Rafael Estrella jurnalistlərin suallarına cavab verərək dedi ki, Parlament Assambleyasının rəhbərləri ölkəmizə Milli Məclisin sədri Murtuz Ələsgərovun dəvəti ilə gəlmişlər. Səfərdən əsas məqsəd isə NATO Parlament Assambleyasının işində müşahidəçi qismində iştirak edən Azərbaycanın siyasi həyatı ilə tanış olmaqdır.

X X X

ŞƏHİDLƏR XİYABANINI ZİYARƏT

Elə həmin gün NATO Parlament Assambleyasının prezidenti Rafael Estrella və bu təşkilatın baş katibi Saymon Lann Şəhidlər xiyabanını ziyarət edərək, Azərbaycanın azadlığı, suverenliyi və ərazi bütövlüyü uğrunda canlarını qurban vermiş qəhrəman oğul və qızlarımızın xatirəsini ehtiramla yad etdilər.

Parlament Assambleyasının rəbhərləri şəhidlərin xatirəsinə ehtiram əlaməti olaraq onların məzarları üzərinə və “Əbədi məşəl” abidəsi önünə gül-çiçək dəstələri qoydular.

Şəhidlər xiyabanını ziyarət zamanı qonaqları Milli Məclis sədrinin müavini, ölkəmizin NATO Parlament Assambleyasındakı parlament nümayəndə heyətinin rəhbəri Ziyafət Əsgərov müşayiət edirdi.

X X X

MİLLİ MƏCLİSİN NATO PA-DAKI NÜMAYƏNDƏ HEYƏTİNİN RƏHBƏRİ İLƏ GÖRÜŞ

NATO-nun Parlament Assambleyasının prezidenti Rafael Estrella və bu təşkilatın baş katibi Saymon Lann Şəhidlər xiyabanını ziyarət etdikdən sonra Milli Məclis sədrinin müavini, Milli Məclisin NATO Parlament Assambleyasındakı nümayəndə heyətinin rəhbəri Ziyafət Əskərov ilə görüşmüşlər.

Ziyafət Əskərov qonaqları səmimiyyətlə salamlayaraq bildirdi ki, Azərbaycan NATO Parlament Assambleyasında müşahidəçi statusu alandan sonra ölkəmizin parlament nümayəndə heyəti bu təşkilatın bütün tədbirlərində fəal iştirak edir. Lakin Azərbaycanın Parlament Assambleyasına cəlb edilmiş üzv seçilməsinin vaxtı artıq çoxdan çatmışdır. Belə ki, ölkəmizin mühüm coğrafi-siyasi mövqeyi baxımından bu məsələ hər iki tərəf üçün böyük maraq kəsb edir.

Sonra Ziyafət Əskərov qonaqlara Ermənistanın Azərbaycana qarşı təcavüzünün nəticələri barədə ətraflı məlumat verdi və ümidvar olduğunu bildirdi ki, münaqişənin dinc yolla həllinə dair danışıqlarda əsas maneəyə çevrilmiş təcavüzkarın pozucu mövqeyi NATO Parlament Assambleyasının sessiyasında müzakirə ediləcəkdir.

NATO Parlament Assambleyasının prezidenti Rafael Estrella bildirdi ki, Şimalı Atlantika İttifaqı Cənubi Qafqazda sabitliyə böyük əhəmiyyət verir. Parlament Assambleyası bu mühüm məsələni müzakirə etmək məqsədi ilə cari ilin ikinci yarısında Tbilisidə regional təhlükəsizlik problemlərinə həsr olunmuş seminar keçirəcəkdir.

X X X

MİLLİ MƏCLİSDƏ TƏMSİL OLUNAN SİYASİ PARTİYALARIN NÜMAYƏNDƏLƏRİ İLƏ GÖRÜŞ

NATO Parlament Assambleyasının prezidenti Rafael Estrella və bu təşkilatın baş katibi Saymon Lann yanvarın 17-də Milli Məclisdə təmsil olunan siyasi partiyaların nümayəndələri ilə görüşmüşlər.

Yeni Azərbaycan Partiyasından Milli Məclisin deputatı Siyavuş Novruzov Azərbaycan Prezidenti Heydər Əliyevin rəhbərliyi ilə ölkəmizdə həyata keçirilən demokratik islahatlar, habelə Ermənistanın Azərbaycana təcavüzünün nəticələri barədə qonaqlara geniş məlumat verdi. Milli Məclisin deputatları, Xalq Cəbhəsi Partiyasının sədri Əli Kərimli, Sosial Rifah Partiyasının sədri Xanhüseyn Kazımlı və başqaları bildirdilər ki, Azərbaycandakı bütün siyasi partiyaları dünyada sülhün və təhlükəsizliyin qorunub saxlanmasında mühüm rol oynayan Şimali Atlantika İttifaqı ilə ölkəmizin daha sıx inteqrasiyasına tərəfdardır.

NATO Parlament Assambleyasının prezidenti Rafael Estrella vurğuladı ki, alyansın üzvü olan dövlətlərdəki siyasi partiyaların hamısı öz ölkələrinin taleyüklü məsələlərinın həlli zamanı həmrəylik nümayiş etdirirlər. O dedi: “Mənə elə gəlir ki, Azərbaycandakı partiyalar da bütün siyasi qurumların təkmilləşməsi üçün səylərini əsirgəməyəcək və bu, son nəticədə döyüş qabiliyyətli ordu və güclü ölkə yaradılmasına gətirib çıxaracaqdır”.

X X X

MİLLİ MƏCLİSDƏ QƏBUL

Elə həmin gün Milli Məclisin sədri Murtuz Ələsgərov ölkəmizdə rəsmi səfərdə olan NATO Parlament Assambleyasının prezidenti Rafael Estrellanı və bu təşkilatın baş katibi Saymon Lannı qəbul etmişdir.

Murtuz Ələsgərov qonaqları səmimiyyətlə salamlayaraq dedi ki, onların bu səfəri Milli Məclislə NATO-nun Parlament Assambleyası arasında əlaqələrin genişləndirilməsinə xidmət edəcəkdir. NATO-nun keçmiş baş katibi Corc Robertsonun ölkəmizə ötənilki səfəri və onun Prezident Heydər Əliyev ilə görüşü Azərbaycanla NATO arasında əlaqələrin inkişafında mühüm rol oynamışdır. Həmin görüşdə Cənubi Qafqazda sülh və təhlükəsizlik məsələləri müzakirə olunmuşdur. Ölkəmiz Şimali Atlantika İttifaqının tədbirlərində fəal iştirak edir. NATO-nun “Sülh naminə tərəfdaşlıq” proqramına qoşulmuş Azərbaycan Şimali Atlantika İttifaqının təlimlərində, o cümlədən “Korporativ Determineyşn” təlimində fəal iştirak etmişdir. Bundan əlavə, Azərbaycan ordusunun bölüyü Kosovadakı sülhməramlı qüvvələrin tərkibinə daxil edilmişdi. Azərbaycan parlamentinin NATO Parlament Assambleyasındakı nümayəndə heyətinin fəaliyyəti də təqdirə layiqdir. Nümayəndə heyətinin üzvləri bu yaxınlarda Buxarestdə keçirilmiş seminarda Cənubi Qafqazda sabitlik yaradılması və münaqişələrin aradan qaldırılması işində dövlətimizin mövqeyini açıqlamışlar. Regionumuzda təhlükəsizliyin pozulmasının əsas günahkarı Ermənistandır və o, nəinki öz ərazisində başqa dövlətin hərbi bazalarını yerləşdirir, həm də onları daha da gücləndirir.

Sonra Murtuz Ələsgərov Milli Məclisin NATO Parlament Assambleyasındakı nümayəndə heyətinin fəaliyyətini gücləndirmək üçün ölkəmizin bu təşkilata assosiativ üzvlüyü məsələsinin tezliklə müzakirə edilməsinin zəruriliyini vurğuladı və bildirdi ki, biz bu barədə Parlament Assambleyasının rəhbərliyinə və NATO-nun üzvü olan ölkələrin nümayəndələrinə məktub göndərmişik.

Milli Məclisin sədri ölkədə aparılan siyasi, sosial-iqtisadi islahatlar barədə də məlumat verdi və NATO PA-nın rəhbərliyindən Dağlıq Qarabağ münaqişəsinin ədalətli həlli üçün səylərini əsirgəməməyi xahiş etdi.

Rafael Estrella səmimi qəbula görə təşəkkür edərək, səfər zamanı keçirdiyi görüşlər barədə məlumat verdi. O, xüsusi vurğuladı ki, siyasi partiyaların nümayəndələri ilə aparılmış faydalı fikir mübadiləsi NATO PA ilə Azərbaycan arasında münasibətlərin dərinləşməsinə kömək edəcəkdir.

Qonaq Cənubi Qafqazda təhlükəsizlik və sabitlik problemlərinə toxunaraq dedi ki, NATO rəhbərliyi Azərbaycanla əməkdaşlığa xüsusi əhəmiyyət verir. “Bu əməkdaşlıq hər hansı bir dövlətə qarşı yönəlməmişdir və biz yaxşı başa düşürük ki, Avropanın təhlükəsizliyi Cənubi Qafqazdakı və Mərkəzi Asiyadakı sabitlikdən çox asılıdır”.

Cənab Estrella bildirdi ki, NATO PA özünün növbəti sessiyasında Azərbaycanın bu təşkilata assosiativ üzvlüyü məsələsini müzakirə etmək niyyətindədir.

Qəbulda sülh və təhlükəsizlik problemlərinə dair bir sıra digər məsələlər də müzakirə olundu.

Milli Məclisin sədri Murtuz Ələsgərov həmin gün axşam NATO Parlament Assambleyasının prezidenti Rafael Estrellanın şərəfinə şam yeməyi verdi.