Əziz qonaqlar!

Əziz mərasim iştirakçıları!

Bu gün Naxçıvan Muxtar Respublikasında, Azərbaycanın ayrılmaz parçası olan bu qədim torpaqda çox mühüm, əlamətdar bir hadisə baş verir. Zirvəsində ümummilli liderimizin dayandığı Azərbaycanın quruculuq salnaməsinə daha bir obyektin adı yazılır. Əsaslı yenidənqurma və tikinti işlərindən sonra Naxçıvan beynəlxalq hava limanı istifadəyə verilir. Müasir memarlığın ən mühüm elementlərini özündə cəmləşdirən bu yaraşıqlı hava limanı bilavasitə möhtərəm Heydər Əliyevin adı ilə bağlıdır, onun xeyir-duası, qayğı və himayəsi ilə tikilib ərsəyə gəlmişdir və ümummilli liderimizin quruculuq işlərinin daha bir nümunəsi və yadigarıdır.

Tikintisi üçün xüsusi müşavirə keçirdiyi, göstərişlər verdiyi, layihəsini dönə-dönə müzakirə etdiyi Naxçıvan beynəlxalq hava limanının istifadəyə verilməsi möhtərəm Heydər Əliyevin ən böyük arzularından biri idi. Bu gün xalqımızın böyük oğlunun bu arzusunun da gerçəkləşdiyi gündür. Müstəqil Azərbaycanın qurucusu və memarı, xalqımızın ümummilli lideri möhtərəm Heydər Əliyevin əziz xatirəsini yad etməyi xahiş edirəm.

(Ümummilli lider Heydər Əliyevin əziz xatirəsi bir dəqiqəlik sükutla yad olundu).

Mayın 10-da xalqımız möhtərəm Heydər Əliyevin anadan olmasının 81-ci ildönümünü geniş qeyd etdi. Heydər Əliyev - Azərbaycan mənəvi bağlılığı zaman keçdikcə daha da möhkəmlənir. Xalqımız öz sevimli liderinin adını və əməllərini daim yaşadacaq, onun özü qədər dövlət, xalq işini etibar etdiyi, güvəndiyi ən layiqli davamçısı olan ölkəmizin başçısı cənab İlham Əliyevin rəhbərliyi ilə ümummilli liderimizin yolu ilə gedəcəkdir.

Cənab Prezident!

Möhtərəm Heydər Əliyev dühasının bəhrəsi olan, Sizin qayğınız sayəsində tamamlanan və istifadəyə verilən hava limanı Naxçıvan Muxtar Respublikasının 80 illik yubileyinə ən layiqli töhfənizdir. Muxtar Respublikanın 80 illik yubileyinin keçirilməsi barədə verdiyiniz çox mühüm Sərəncama, yubiley münasibətilə istifadəyə verilən yeni obyektlərin açılışında şəxsən iştirakınıza və dövlətimizin başçısı kimi Muxtar Respublikaya ilk səfərinizə görə Sizə Naxçıvan Muxtar Respublikasının əhalisi adından və şəxsən öz adımdan dərin minnətdarlığımızı bildirirəm.

Hörmətli mərasim iştirakçıları!

Azərbaycanın əsas ərazisindən təcrid olunmuş şəraitdə yaşayan Naxçıvanın nəqliyyat problemlərinin həlli möhtərəm Heydər Əliyevi daim düşündürmüşdür. Bu qayğının nəticəsidir ki, 1974-cü ildə Naxçıvanda ilk hava limanı tikilib istifadəyə verildi. 1800 metrlik uçuş-enmə zolağına malik hava limanı o vaxt avtobus marşrutlarının, dəmir yol nəqliyyatının müntəzəm işlədiyi dövrün tələbləri baxımından ehtiyacların ödənilməsinə hesablanmışdı. Lakin Dağlıq Qarabağa əsassız erməni iddiaları nəticəsində başlanan müharibənin zərbə dalğaları Naxçıvana dəyəndən, regionu Azərbaycanın əsas hissəsi ilə bağlayan bütün nəqliyyat-kommunikasiya əlaqələri kəsiləndən, Naxçıvan Muxtar Respublikası Ermənistan tərəfindən blokadaya alınandan sonra sərnişin, yük daşınması kimi vacib məsələlər kiçik tutumlu təyyarələri qəbul etmək imkanı olan bu hava limanı vasitəsilə həyata keçirilirdi.

Təsadüfi deyil ki, Bakı ilə əlaqənin yeganə mümkün forması olan hava yolu yerli əhali tərəfindən “həyat yolu” adlandırılırdı. Hamı gözəl dərk edirdi ki, bu yolu, həyatı onlara möhtərəm Heydər Əliyev bəxş edibdir. Naxçıvan Muxtar Respublikası bugünkü mövcudluğu üçün də həmin dövrlərdə Naxçıvanda yaşayıb fəaliyyət göstərən möhtərəm Heydər Əliyevə daim minnətdar olacaqdır.

Möhtərəm Heydər Əliyev Naxçıvan hava limanının genişləndirilməsi barədə iki dəfə qərar qəbul etmişdir. Limanın genişləndirilməsi məsələsi ilk dəfə 1992-ci ilin fevralında qaldırıldı. Məsələni Ali Məclisin rəyasət heyətinin iclasında xüsusi müzakirəyə çıxaran xalqımızın böyük oğlu Naxçıvan hava limanında uzunluğu 3300 metr olan uçuş-enmə zolağının tikilib istifadəyə verilməsinə nail oldu. Bu, həmin dövr üçün çox mühüm addım idi.

Hava limanının gücü müasir tələblərə cavab vermədiyindən, ölkəmizin rəhbəri 2002-ci il avqustun 11-də onun genişləndirilməsi barədə qərar qəbul edərək, Muxtar Respublikanın Ali Məclisində xüsusi müşavirə keçirdi. Blokada ilə əlaqədar Naxçıvan sakinlərinin ölkəmizin digər yerlərində yaşayanlara nisbətən təyyarələrdən istifadəyə daha kəskin ehtiyac duyduqlarını bildirən möhtərəm Heydər Əliyev həmin müşavirədə demişdir:

“Mən çoxdan bu fikirdə idim ki, Naxçıvan hava limanını yenidən quraq, yəni yeni bir hava limanı tikək. Birincisi, gərək elə edək ki, təyyarələr buradan təkcə Bakıya, Gəncəyə yox, bir çox istiqamətlərə uçsun. İkincisi də, Naxçıvan öz coğrafi vəziyyətinə görə elə yer tutur ki, burada beynəlxalq standartlara uyğun hava limanının olması təkcə Naxçıvan üçün yox, bütün qonşu ölkələr üçün də çox əhəmiyyətli olacaqdır. Bunları nəzərə alaraq, mən belə bir qərara gəldim”.

İnşasına 2002-ci il oktyabrın 1-də başlanan Naxçıvan beynəlxalq hava limanında tikinti və yenidənqurma işləri ümummilli liderimizin tapşırıqlarına uyğun şəkildə, yeni limanı necə görmək istədiyi barədə arzuları nəzərə alınmaqla aparılmışdır. Bölgənin sərt iqlim şəraitini nəzərə alaraq, hava limanının uçuş-enmə zolağı betondan hazırlanmışdır. Bu zolağın uzunluğu, genişliyi və möhkəmliyi müasir təyyarəqayırma sənayesinin ən son nailiyyətləri olan ağır təyyarələri qəbul etməyə imkan yaradır.

Qardaş Türkiyənin “Eren port” şirkəti hava limanında və aerovağzal kompleksində tikinti-quraşdırma işlərini ən müasir tələblər baxımından aparmışdır. Hava limanı saatda 300 sərnişinə xidmət göstərəcəkdir. Burada uçuşları idarəetmə məntəqəsi, VİP salonu, yük terminalı, yanacaq anbarı, yanğınsöndürmə binası, istilik mərkəzi, transformator yarımstansiyaları, su anbarları yaradılmışdır. Ən müasir işıq-siqnal sistemləri, yeni radiotexnika vasitələri quraşdırılmış, mühəndis-kommunikasiya xətləri çəkilmiş, ərazinin və xidmət sahələrinin genişlənməsi hesabına hava limanında əlavə olaraq 200-ə yaxın yeni iş yeri açılmışdır. Hava limanının tikintisini keyfiyyətlə və vaxtında başa çatdırdıqlarına görə “Eren port” şirkətinə və tikintidə çalışanların hamısına təşəkkürümüzü bildiririk.

Cənab Prezident, ötən ilin sentyabrında professor Əziz Əliyev tankerinin istismara verilməsi və Yaxt-klubun açılışı münasibətilə keçirilən mərasimdəki çıxışınızda demişdiniz: “Naxçıvanda yeni aeorvoğzal kompleksi və hava limanı tikilir. Hava limanı ən yüksək standartlara cavab verəcəkdir. Çünki blokada şəraitində yaşayan, Azərbaycanın ayrılmaz hissəsi olan Naxçıvan cənab Prezidentin daim diqqət mərkəzində olmuşdur. Hökumət oraya daim diqqət göstərir, bundan sonra da göstərəcəkdir”. Bu qayğının və diqqətin nəticəsidir ki, tikintisi başa çatdırılan hava limanına ölkəmizin Prezidentinin tapşırığı ilə beynəlxalq hava limanı statusu verilmişdir. Naxçıvanın blokada vəziyyəti ilə bağlı problemlərinə həssas münasibətinizə görə Sizə bir daha minnətdarlığımızı bildiririk. Diqqətinizə görə çox sağ olun.