NAXÇIVAN MR ALİ MƏCLİSİNİN SƏDRİ VASİF TALIBOVUN ÇIXIŞI
-Möhtərəm Prezident!
Sizin Azərbaycanın Naxçıvan Muxtar Respublikasına hər səfəriniz əsl bayrama çevrilir. Ötən 4 il ərzində Naxçıvan Muxtar Respublikasına etdiyiniz səfərlər ümummilli liderimizlə başlanan ənənənin, quruculuq və yeniləşmə xəttinin müasir şəraitdə davamı kimi yadda qalmış, diyarımızın sosial-iqtisadi inkişafına əvəzsiz töhfələr bəxş etmişdir. Naxçıvana yaraşıq verən müasir memarlıq nümunələri, muxtar respublikanın rayonlarında, kənd yerlərində inşa olunan məktəblər, kənd mərkəzləri, səhiyyə, sağlamlıq və elm müəssisələri, əlil və qaçqın-köçkünlər üçün yaşayış evləri, inzibati binalar Sizin yadigarlarınızdır və uğurla davam etdirdiyiniz Heydər Əliyev quruculuq xəttinin bəhrələridir. Bu gün onların sırasına daha bir obyekt - Şərur rayon xəstəxana şəhərciyi daxil olur. Əhalinin sağlamlığına layiqli töhfə olan xəstəxana şəhərciyinin istifadəyə verilməsinə görə hörmətli Prezidentimizə dərin minnətdarlığımızı bildiririk.
Şərur rayon xəstəxana şəhərciyinin tikilib tamamlanması, müasir avadanlıqla təmin olunması ölkə rəhbərinin əhalinin sağlamlığına, insanların ömrünün uzadılmasına, sosial problemlərin həllinə həssaslıqla yanaşmasının daha bir ifadəsidir. Milli səhiyyəmizin bugünkü inkişafı ötən əsrin 70-ci illərindən yaradılmış möhkəm bazaya istinad edir. Ümummilli liderimizin apardığı məqsədyönlü siyasət nəticəsində həyatın bir çox sahələri kimi, tibb elmi və səhiyyə də sürətlə inkişaf etmiş, səhiyyə şəbəkələri genişlənmiş, tibbi kadrların hazırlanması sahəsində ciddi nailiyyətlər qazanılmışdı. Həmin dövrdə Azərbaycan səhiyyəsi canlanmış, sahənin maddi-texniki bazası güclənmiş, təkcə Bakıda yox, rayonlarda, ən ucqar kəndlərdə belə xəstəxanalar, dispanserlər və tibb məntəqələri yaradılmışdı.
Möhtərəm Heydər Əliyev səhiyyənin inkişafına daim xüsusi diqqət, qayğı göstərərək deyirdi: “Səhiyyə həddindən artıq geniş, həyatın bütün sahələrini əhatə edən, cəmiyyət üçün, dövlət üçün, hər bir insan üçün çox lazımlı sahədir. Ona görə bu sahənin inkişafı üçün bu gün lazımi tədbirlər görülür, gələcəkdə də görüləcəkdir”.
Ümummilli liderimizin çox böyük uzaqgörənliklə müəyyənləşdirdiyi inkişaf xətti əsas götürülərək, doğma Azərbaycanımız yenidən qurulur, inkişaf etdirilir. Sosial problemlərin həlli, o cümlədən səhiyyənin inkişafı bir nömrəli vəzifələr sırasına çıxarılmış, büdcənin böyük bir hissəsi sosial məsələlərin həllinə yönəldilmişdir. Bu siyasətin davam etdirilməsinin vacibliyindən danışan hörmətli Prezidentimiz İlham Əliyev demişdir: “Azərbaycanın iqtisadi potensialı çox sürətlə güclənəcəkdir. Bu da öz növbəsində imkan verəcəkdir ki, sosial məsələlərə daha böyük diqqət göstərilsin. Bizim məqsədimiz budur, Heydər Əliyev siyasəti budur, biz bu siyasətə sadiqik”.
Ulu öndərimizin quruculuq xəttinə sadiqliyin ən mühüm göstəricilərindən biri də ölkə Prezidentinin 2004-cü il 11 fevral tarixli Fərmanı ilə təsdiq olunmuş regionların sosial-iqtisadi inkişafı Dövlət Proqramıdır. Proqramda digər sahələrlə yanaşı, sosial problemlərin həlli də öz əksini tapmış, səhiyyə şəbəkələrinin genişləndirilməsi, maddi-texniki bazasının möhkəmləndirilməsi istiqamətində konkret vəzifələr müəyyənləşdirilmişdir. Ölkə rəhbərinin qayğısı sayəsində təkcə son iki ildə Naxçıvan Muxtar Respublikasında 43 yeni səhiyyə obyekti tikilmiş və ya əsaslı təmir olunmuşdur. 2006-cı ildə 18, cari ildə isə 20 səhiyyə müəssisəsi əhalinin istifadəsinə verilmişdir. Hazırda 5 səhiyyə obyektində tikinti işləri davam etdirilir. Bir qayda olaraq, yeni tikilən kənd mərkəzlərində, məktəblərdə tibb məntəqələri də istifadəyə verilir.
Muxtar respublikada tikilən səhiyyə obyeklərinin fəaliyyətindən danışarkən, hörmətli Prezidentimizin himayəsi ilə ucaldılan Müalicə-Diaqnostika Mərkəzini xüsusi qeyd etmək istəyirəm. Mərkəz öz fəaliyyətini genişləndirir, muxtar respublikanın tarixində ilk dəfə olaraq, burada açıq ürək üzərində əməliyyatlar aparılmışdır. Bu səhiyyə ocağı blokada vəziyyəti ilə bağlı ölkəmizin digər ərazilərinə gediş-gəlişin çətin olduğu bir dövrdə muxtar respublikanın özündə pulsuz və ixtisaslı müalicə almağa imkan verir.
Səhiyyənin təkcə bu gününü yox, həm də gələcəyini düşünən ölkə rəhbəri demişdir: “İnsanlar yüksək səviyyəli tibbi xidmət almalıdırlar, xəstəxanalar gözəl olmalıdır, hər yerdə avadanlıq müasir olmalıdır. Çox gözəl şərait yaradılmalıdır, peşəkar kadrlar olmalıdır”. Muxtar respublikada görülən işlərdə, həyata keçirilən bütün tədbirlərdə hörmətli Prezidentimizin bu tələbləri fəaliyyətimizin mühüm meyarı kimi götürülür, işlər buna uyğunlaşdırılır.
Zirzəmi qatı ilə birlikdə 4 mərtəbədən ibarət olan xəstəxana 65 çarpayılıq əsas korpusdan və ayrılıqda yerləşən 16 çarpayılıq yoluxucu xəstəliklər şöbəsindən ibarətdir. Xəstəxanada 10 şöbə, 7 kabinə və 1 bölmə fəaliyyət göstərəcəkdir. Ümumi cərrahiyyə, göz, lor və ginekoloji əməliyyatların aparılması üçün otaqlar, reanimasiya otaqları vardır. Buradakı 431 min manat dəyərində avadanlıq müalicə və profilaktika işini müasir tələblər səviyyəsində qurmağa imkan yaradır. Bu avadanlığın alınması üçün vəsaitin 206 min manatını Azərbaycan Respublikasının Səhiyyə Nazirliyi tərəfindən verilmişdir.
Möhtərəm Prezident, Sizi əmin edirik ki, muxtar respublikanın tibb işçiləri əhalinin sağlamlığının qorunması naminə bundan sonra da fədakarlıqla çalışacaqlar.
Diqqətinizə görə sağ olun.
X X X
Azərbaycan Prezidenti İlham Əliyev mərasimdə nitq söylədi.
Bölmənin digər xəbərləri
