NDU-da “Gənclərin karyera inkişafında təhsilin və innovasiyanın rolu” mövzusunda forum keçirilib
Naxçıvan, 25 aprel, AZƏRTAC
Naxçıvan Dövlət Universitetində “Konstitusiya və Suverenlik İli” çərçivəsində “Gənclərin karyera inkişafında təhsilin və innovasiyanın rolu” mövzusunda forum keçirilib.
NDU-nun Media və ictimaiyyətlə əlaqələr şöbəsindən AZƏRTAC-ın bölgə müxbirinə bildirilib ki, forum Naxçıvan Dövlət Universitetinin və Azərbaycan Respublikası Gənclər Fondunun tərəfdaşlığı, həmçinin Gənclərin İnkişaf və Karyera Mərkəzinin təşkilatçılığı ilə baş tutub. Təşkilatçı və dövlət qurumlarının rəhbərlərinin, universitetin müəllim-tələbə heyətinin iştirakı etdiyi forum gənclərdə hüquqi savadlılıq, vətəndaşlıq məsuliyyəti və milli dəyərlərə bağlılığın artırılması məqsədi daşıyıb.
Öncə Ümummilli Lider Heydər Əliyevin və şəhidlərimizin xatirəsi bir dəqiqəlik sükutla yad edilib, Dövlət Himni səsləndirilib.
Naxçıvan Dövlət Universitetinin rektoru Elbrus İsayev çıxışında bildirib ki, karyera üçün tələbə təşəbbüslərinin dəstəklənməsi önəmlidir və universitetdə bunun üçün çox geniş imkanlar təklif olunur, həmçinin uğurlu nəticələr var. Xüsusilə Tələbə Gənclər Təşkilatı (TGT), Tələbə Elmi Cəmiyyəti (TEC) və Tələbə Həmkarlar İttifaqı Komitəsinin (THİK) fəaliyyətləri uğurludur. Universitetin ENACTUS komandası ardıcıl olaraq 5 dəfə “Enactus Azərbaycan Milli Yarışı”nın qalibi olub, dünya çempionatında ölkəmizi təmsil ediblər. Universitetdə Avropa Tibb Tələbələri Assosiasiyası (EMSA) və Avropa Hüquqşünas Tələbələr Assosiasiyası (ELSA) tələbə təşkilatının üzvlüyü təsdiq olunub. Ötən il tələbələr 8 qrant müsabiqəsinin qalibi olublar, bir neçə il ard-arda Azərbaycanda “İlin Tələbə Gənclər Təşkilatı" seçilib və xüsusi mükafata layiq görülüblər. Universitetin TGT-nin keçmiş sədri Gənclər üçün Prezident mükafatına layiq görülüb. Bütün bunlar gənclər üçün stimuldur və universitetdə bu gün rəhbər heyətdə çalışan gənclər var.
Gənclərin İnkişaf və Karyera Mərkəzinin Baş direktoru Azər Əliyev ölkəmizdə icra olunan gənclər strategiyası barədə məlumatları bölüşüb. Gənclər və İdman Nazirliyinin yaradılmasından, Azərbaycanda 2 Fevral - Gənclər Gününün təsis olunmasından, “Gənclər siyasəti haqqında” qanun və gənclərlə bağlı müxtəlif Dövlət proqramlardan bəhs edib. O, sürətlə rəqəmsallaşan dünyada gənclərin peşəkar inkişafına dəstək göstərmək üçün təhsil və innovasiyanın vacibliyindən də söhbət açıb.
Tədbir “Təhsil və İnnovasiya: Gənclərin karyera inkişafında yeni perspektivlər” mövzusunda panel müzakirəsi ilə davam edib. Naxçıvan Muxtar Respublikasının təhsil naziri Elxan Nəcəfov, Naxçıvan Muxtar Respublikasının gənclər və idman naziri səlahiyyətlərini icra edən, nazir müavini Məcid Seyidov, Naxçıvan Muxtar Respublikasının əmək və əhalinin sosial müdafiəsi naziri səlahiyyətlərini icra edən, nazir müavini Fərid Bağırzadə və Naxçıvan Muxtar Respublikası rəqəmsal inkişaf və nəqliyyat nazirinin müavini, nazir səlahiyyətlərini icra edən Rahid Ələkbərli mövzu ətrafında çıxış edib, fikir mübadiləsi aparıblar. Çıxışlarda natiqlər təhsil və innovasiyanın gənclərin peşəkar inkişafındakı əhəmiyyətini vurğulayıb, Naxçıvan Muxtar Respublikasında həyata keçirilən layihələrin bu sahədə yaratdığı imkanları diqqətə çatdırıb və gənclərin karyera inkişafında qarşıya qoyulan əsaslı çağırışlardan bəhs ediblər.
Sonra mövzu üzrə sual-cavab sessiyası keçirilib.
Bölmənin digər xəbərləri
