Nihal Saad: İrsə əsaslanan yenidənqurma güclü cavab modelidir
Bakı, 21 may, AZƏRTAC
Bu gün dünyanın bir çox şəhərlərində parçalanma, bərabərsizlik və sosial gərginliklər artdığı bir dövrdə irsə əsaslanan yenidənqurma güclü bir cavab modeli təqdim edir. Bu yanaşma inkişafın yalnız iqtisadi səmərəliliklə deyil, həm də sosial inklüzivlik və mədəni əsaslarla həyata keçirilməsini təmin edir.
AZƏRTAC xəbər verir ki, bunu Birləşmiş Millətlər Təşkilatının Sivilizasiyalar Alyansının (UNAOC) direktoru Nihal Saad mayın 21-də BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində keçirilən "Secure Model-Münaqişədənsonrakı şəhərlərin davamlı və gücləndirici mədəni canlanması" adlı panel sessiyada videobağlantıda çıxışı zamanı söyləyib.
O deyib ki, beynəlxalq dialoq üçün bu xüsusilə vacibdir, çünki dialoq öz-özünə baş vermir, o, insanların özlərini aid hiss etdiyi, ləyaqət duyduğu və ortaq sahiblik hissi yaşadığı məkanlarda formalaşır.
"İrsin dirçəldilməsi məhz belə məkanların yaranmasına xidmət edir. Bu, xüsusilə müxtəlif şəhər mühitlərində, inklüziv narrativlərin və mədəni müxtəlifliyin tanınmasının sülh və dayanıqlı cəmiyyətlərin qurulması üçün vacib olduğu hallarda önəmlidir", - deyə Nihal Saad diqqətə çatdırıb.
Bölmənin digər xəbərləri
