NİİM piyadaları və sürücüləri yollarda diqqətli olmağa çağırıb VİDEO
Bakı, 12 sentyabr, AZƏRTAC
Bu gün günorta saatlarında paytaxtın Nəsimi rayonunun Səməd Vurğun küçəsində yerləşən "Göy məscid"in qarşısında - mərkəz istiqamətində piyadanın vurulması ilə nəticələnən yol-nəqliyyat hadisəsi hərəkət iştirakçıları üçün ibrət dərsi və ciddi xəbərdarlıq olmalıdır.
Bu barədə AZƏRTAC-a Daxili İşlər Nazirliyinin Nəqliyyatı İntellektual İdarəetmə Mərkəzinin (NİİM) İctimaiyyətlə əlaqələr sektorunun müdiri Ömər Xıdırov bildirib.
O deyib ki, aparılan təbliğat-izahat və maarifləndirmə işləri nəticəsində piyadaların çox hissəsi keçidlərdən istifadə edirlər. “Bu, yaxşı nəticədir. Ancaq bəzi hallarda sürücülərin onlara yol verdiyinə tam əmin olmadan keçidlərdən keçən piyadalar özlərini təhlükəyə atırlar. Bu cür qəzaların baş verməsinə səbəb olan digər bir vacib məqam isə sürücülərin keçidlərə yaxınlaşarkən piyada keçidinin olduğunu bildirən nişana diqqət yetirməməsi və yüksək sürətlə nəqliyyat vasitəsini idarə etməsi ilə bağlıdır. Təəssüflər olsun ki, belə olduqda piyadanın ölümü və xəsarəti ilə nəticələnən qəzalar qeydə alınır”, - deyə o vurğulayıb.
Ömər Xıdırov diqqətə çatdırıb ki, NİİM tərəfindən bu mövzu daim diqqət mərkəzində saxlanılır.”Əsas məqsəd ondan ibarətdir ki, yol hərəkəti iştirakçıları qəzaların iştirakçısı, qurbanı olmasınlar. Bir daha xahişimiz ondan ibarətdir ki, piyadalar keçidlərdə yolu keçərkən diqqətli olmalı, yolun hərəkət hissəsinə yalnız yaxınlaşmaqda olan nəqliyyat vasitələrinədək məsafəni, onların sürətini qiymətləndirdikdən və yolu keçməyin onlar üçün təhlükəsiz olacağını yəqin etdikdən sonra keçiddən keçməlidirlər. Sürücülər isə piyada keçidlərinə yaxınlaşarkən sürəti azaltmalı, keçidin olduğunu bildirən nişana diqqət yetirməli və piyadalara yol verməlidirlər. Bütün bunlara laqeyd yanaşılmamalı və qaydalara əməl edilməlidir”, - deyə sektor müdiri bildirib.
Bölmənin digər xəbərləri
